ԱՄՆ Կոնգրեսը հաստատել է նախագահական ընտրությունների արդյունքները: Երկու պալատների անդամները համաձայնել են Ընտրիչների կոլեգիայի դիրքորոշմանը, որը դեկտեմբերի վերջին հաղթող էր ճանաչել դեմոկրատների թեկնածու Ջո Բայդենին:
Ենթադրվում էր, որ ընտրություններում հաղթողը Կոնգրեսում պետք է հաստատվեր մի քանի ժամ շուտ, բայց հանդիպումը հետաձգվել էր Վաշինգտոնում անկարգությունների պատճառով: Դոնալդ Թրամփի կողմնակիցները, որոնք հավաքվել էին քաղաքի կենտրոնում, ինչ-որ պահի կարողացել էին ճեղքել պաշարումը և մտել Կապիտոլիումի շենքը: Վերջին տվյալների համաձայն՝ անկարգությունների արդյունքում 4 մարդ է զոհվել, մի քանի տասնյակ մարդ բերման է ենթարկվել:
Որոշ հանրապետական օրենսդիրներ փորձել են տապալել Բայդենի հաստատումը՝ փորձելով բողոքարկել ընտրությունների արդյունքները Ջորջիա, Միչիգան, Նևադա և Փենսիլվանիա նահանգներում: Սակայն նրանց նախաձեռնությունը աջակցություն չի գտել, այդ թվում՝ համակուսակիցների շրջանում:
