Ցավով կարելի է արձանագրել, որ հայ պաշտոնյաները չեն պատկերացնում ՀՀ տնտեսական և քաղաքական իրական վիճակը և փորձում են տղայական ինչ-որ հայտարարություններ անել՝ առանց հասկանալու դրանց հետևանքները։ Azg.am-ի թղթակցի հետ զրույցում նման տեսակետ հայտնեց տնտեսագետ Սուրեն Պարսյանը՝ անդրադառնալով ՀՀ վարչապետի աշխատակազմի ղեկավար Արայիկ Հարությունյանի ֆեյսբուքյան գրառմանը։
Հիշեցնենք, որ հայկական բեռնատարների՝ Լարսի անցակետը հատելու և ՌԴ մուտք գործելու արգելքի ֆոնին վերջինս գրել էր. «Որևէ ԼԱՐՍԻ անցակետ փակելը մեր վրա չի ազդի, եթե Հայաստանի բիզնեսը նոր շուկաներ գտնի արտասահմանում ապրող մեր հայրենակիցների տոնական և ոչ տոնական սեղաններին: Ամանորի և Սուրբ ծննդյան տոների սեղաններին պետք է լինի բացառապես հայկական արտադրության բանջարեղեն, միրգ, գինի, կոնյակ, այլ գյուղարտադրանք»։
Տնտեսագետը նշեց մի քանի հանգամանք, որոնցով կարևորվում է Լարսի անցակետի բաց լինելը ոչ միայն արտահանումների, այլև ներմուծումների համար։
«Հայաստանը Ռուսաստանից է ստանում ցորենի 75 տոկոսը։ Մենք ցորենի ինքնբավության մասով շատ ցածր մակարդակ ունենք՝ մոտ 25 տոկոս։ Ռուսաստանից ենք ստանում շաքարավազի, ձեթի, մարգարինի, կաթնամթերքի և առաջին անհրաժեշտության շատ այլ ապրանքներին զգալի խմբաքանակներ։
Վերջապես ՌԴ-ից ենք ստանում մեր էներգակիրների 76 տոկոսը։ Այս պարագայում, եթե Լարսի անցակետը փակվի, ապա մենք կարող ենք ներքին շուկայում պարենային բավական լուրջ խնդիրներ ունենալ։
Արտահանման մասով Լարսը մեզ համար ամենակարճ ճանապարհն է Ռուսաստանի հետ առևտուր անելու համար. վերջին երկու տարիների տնտեսական բումը պայմանավորված է դեպի ՌԴ արտահանումներով։ Դա պետք է հասկանալ և գնահատել, ոչ թե մատների արանքով նայել Լարսի անցակետին։
Այժմ, երբ Լարսի անցակետը փակ է հայկական բեռնատարների համար, ՀՀ իշխանությունները փորձում են խնդիրը գցել հայ տնտեսվարողների վրա, որ իբր նրանք չեն կարողացել լավ աշխատել և այլընտրանքայիին շուկաներ չեն գտել։
Իսկ այլընտրանքային շուկաներ գտենելը, մանավանդ հիմա, բավական դժվար է։ Պետք է կարողանալ տնտեսական գործընթացները հնարավորինս զերծ պահել քաղաքական մանիպուլյատիվ հայտարարություններից, որովհետև այդ հայտարարություններից տուժում են ոչ թե պաշտոնյաները, այլ ամբողջ տարին քրտինք թափած գործարարները։ Հայ պաշտոնայները պետք է հասկանան իրենց հայտարարությունների հետևանքները»,- ամփոփեց Սուրեն Պարսյանը։
