Հայաստանը ներկայացնող սոպրանո (կանացի երգչական ամենաբարձր ձայնը) Ջուլիանա Գրիգորյանը Ռիգայում կայացած համաշխարհային Operalia 2022 մրցույթում նվաճել է առաջին տեղը` միաժամանակ արժանանալով Ռոլեքսի կողմից տրվող «Հանդիսատեսի» մրցանակին։
Մրցանակը նրան է հանձնել համաշխարհային մեգաաստղ, տենոր Պլասիդո Դոմինգոն։
«Operalia» ամենամյա մրցույթն անցկացվել է Փարիզում, Մադրիդում, Տոկիոյում, Պուերտո Ռիկոյում, Լոս Անջելեսում, Վաշինգտոնում, Քվեբեկում, Աստանայում, Բուդապեշտում, Մեխիկոյում: Այս տարի այն կազմակերպվել էր Լատվիայի մայրաքաղաք Ռիգայում։
Նշենք, որ Ջուլիանա Գրիգորյանը վերջերս դարձյալ արժանացել է միջազգային մրցանակի։ Ստանիսլավ Մոնյուշկոյի անվան 11-րդ միջազգային մրցույթին, որն անցկացվել է հունիսի 6-11-ը Լեհաստանի մայրաքաղաք Վարշավայում, երիտասարդ սոպրանոն ստացել է «Գրան պրի»:
Նշենք, որ Ջուլիանա Գրիգորյանը Ալեքսանդր Սպենդիարյանի անվան օպերայի և բալետի ազգային ակադեմիական թատրոնի երիտասարդական օպերային ծրագրի մենակատար է։
