«Մայլից մայլա». ներկայացում՝ գյումրեցիների մասին, ներկայացնում են գյումրեցիները

«Մայլից մայլա» գյումրվա բարբառով ընտրված այս անվամբ բեմադրություն են խաղալու գյումրեցիները Ստանիսլավսկու անվան ռուսական դրամատիկական թատրոնում, հունիսի 13-ին։

Բեմադրել է  ՀՀ վաստակավոր արտիստ Հովհաննես Հովհաննիսյանը։

Խաղում են Սամվել Առաքելյանը,  Հովհաննես Հովհաննիսյանը,  Վարագ Գևորգյանը, Հովհաննես Սարգսյանը,  Դավիթ Մարդոյանը։

Մեկ գործողությամբ զավեշտախաղի հեղինակը ժամանակակից գրող Լիլիթ Մկրտչյանն է։  Նրա «Մայլից մայլա» գրքից վերցված են 5 պատումներ 5 հայտնի անձանց մասին, որոնց միջոցով Լենինականի ու Գյումրու կոլորիտը, ուրախ-տխուր էջերն են ներկայացվում… Գյումրու կոլորիտը, նիստուկացը, հետաքրքիր դեպքերը, հետաքրքիր անձինք մեկտեղվելով, մի մայլից մյուսն անցնելով՝  բարձրացնում Գյումրի անունը և այն անկոտրում ոգին, որն ունի իսկական գյումրեցին։

Տաղավարում հավաքվում են բակի բնակիչներ՝ մեծեր եւ երիտասարդներ, հիշում են լենինականցի և գյումրեցի անվանի մարդկանց, որոնց մեջ ամփոփված է եղել Գյումրի – Լենինականը՝ իր բոլոր ավանդույթներով։

Մայլից մայլա անցնելով՝ պատմում են նաև հարսանեկան ավանդույթների, գյումրեցու նիստուկացի, զրույցների, սովորույթների մասին։ Հիշում են Ղասաբ Գագոյին, Մրոտ Սուրիկին, Չոլախ Վարոսին… Ներկայացման մեջ նչում են մոռացված երգեր, հատկապես՝ շերամական մեղեդիներ։