4 տասնակից ավելի մարդ տարբեր վնասվածքներով տեղափոխվել է բժշկական կենտրոններ

Երևանի Պռոշյան-Դեմիրճկան խաչմերուկում ցուցարարների և ոստիկանական ուժերի միջև իրավիճակը սրվել է։ «Դիմադրություն» շարժման կազմակերպիչները վկայում են, որ ոստիկանները վայրագություններ են արել, իրենք պաշտպանվել են վահաններով, սակայն մարդկանց հարվածել են ոտքով, ձեռքով՝ 10-15 հոգով հարձակվելով մեկ անձի վրա։ Բերման ենթարկելու դեպքում անհամաչափ ուժ է կիրառվել։ Ժամը 22։40-ի տվյալներով՝ 4 տասնյակից ավելի քաղաքացի տեղափոխված է եղել բժշկական տարբեր կենտրոններ։ Նրանք տարբեր վնասվածքներ են ստացել, մի աղջիկ ստացել է բեկորային վնասվածք։
Նշենք, որ ոստիկանները կիրառել են լուսաձայնային նռնակներ։
Ուշ երեկոյան Ֆրանսիայի հրապարակում շարունակվող հանրահավաքի ժամանակ «Դիմադրություն» շարժման ներկայացուցիչներից Գեղամ Նազարյանը նշել է. «Հանգիստ նստեք ու զբաղվեք ձեր առօրյայով, ոստիկանները զոհված զինվորների ծնողներին են ծեծել այսօր։ Նիկոլ, դու սրա համար էլ ես պատասխան տալու ու շատ շուտով»։
Բժիշկ, արցախյան պատերազմների մասնակից Տարոն Տոնոյանն իր ելույթում ասել է. «Այսօր ոստիկաններն իրենց պահեցին խայտառակ ձևով՝ բռնի ուժ կիրառելով սեփական ժողովրդի նկատմամբ։ Մենք ասում ենք՝ ոստիկաններ, ուժային կառույցներ, միացեք մեզ, որ վաղը չամաչեք ձեր այսօրվա պահվածքի համար, բայց ոչինչ, մենք առանց ձեզ էլ ենք ուժեղ, առանց ձեզ էլ ենք այս պայքարում հաղթելու»։
«Դիմադրություն» շարժման համակարգող Իշխան Սաղաթելյանը տեղեկացրել է, որ հունիսի 4-ին՝ ժամը 19։00-ին, Ֆրանսիայի հրապարակում հանրահավաք է լինելու։