Ես հասկանում եմ, որ վերջին մեկ-մեկուկես տարվա քաղաքական խոսույթում է նաև դժգոհությունը ոչ միայն իշխանությունից, այլ նաև ընդդիմությունից, և եթե անկեղծ լինեմ, ես շատ ավելի շատ կասեի՝ մեր աշխատանքից։ Լրագրողների հետ զրույցում այսօր այս մասին ասաց Արմեն Աշոտյանը՝ պատասխանելով այն հարցին, թե ինչու է խորհրդարանական ընդդիմությունն այլընտրանքային քաղաքական օրակարգերի հարցում հապաղում։
«Բայց անկեղծ խոսենք. քաղաքական բանտարկյալների առկայությունը մեր երկրում այս պահի դրությամբ առավել գերակա հարց է, քան ընդդիմության ընթացիկ աշխատանքների հետ կապված քննադատությունը։ Ուստի կխնդրեմ քաղբանտարկյալների գոյության խնդիրը չդարձնել ընդդիմության՝ իրար մեջ «մունաթի» առարկա։
Սա խարան է, քանիցս ասել եմ. Հայաստանում 30-ից ավելի քաղբանտարկյալներ կան, որոնց ազատության համար ընդդիմությունը գուցե լավ չի պայքարում կամ չի հանրայնացնում այդ պայքարը, բայց նաև հասարակությունը լավ չի պայքարում։ Եթե Բագրատ սրբազանի հետ լուսանկարներ ունեցող (ես չունեմ լուսանկար, ես նստել եմ «Սրբազան շարժման» ժամանակ, ցավոք սրտի, անձամբ մասնակից չեմ եղել) մարդկանց գոնե 5 տոկոսը հավաքվի դատարանի դահլիճում կամ ֆեյսբուքում գրառում անի, կամ ակցիա անի, վստահ եմ՝ հանրային ճնշման ներքո Նիկոլը ստիպված կլինի շատ արագ բաց թողնել Բագրատ սրբազանին և մնացած բոլոր անարդար դատվողներին, որովհետև նրանցից առաջացած պրոբլեմներն ավելի շատ կլինեն, քան նստելու պրոբլեմը»,- ասաց Արմեն Աշոտյանը։
Աշոտյանը միաժամանակ նշեց՝ կարդացել է ԱՄՆ նախագահ Դոնալդ Թրամփի գրառումը Լուկաշենկոյի մասին։
«Գեոպոլիտիկան դնում եմ մի կողմ։ Մարդն ասում է՝ Լուկաշենկոն քաղբանտարկյալներից 13 հոգու բաց է թողել, և դրա համար ես շնորհակալ եմ. մենք բանակցել ենք ևս 1300 բելառուս քաղբանտարկյալների ազատության մասին։ Ինչո՞ւ հայ քաղբանտարկյալների հարցը չի հայտնվում Թրամփի օրակարգում։
Ես այս հարցի պատասխանը գիտեմ, բայց ինչո՞ւ չենք աշխատում ամերիկյան ինստիտուտների հետ՝ հասարակական ճնշումով դեսպանատան վրա։ Չէ՞ որ Թրամփը դիրքավորվում է նաև որպես քրիստոնյաների պաշտպան։ Ինչո՞ւ այս հարցը չենք տանում առաջ, որ հնագույն եկեղեցու երկու բարձրագույն հոգևորական նստած է։ Քրիստոնյաների պաշտպան պարո՛ն Թրամփ, հայացքդ նետիր Ադրբեջանի և Ալբանիայի արանքում գտնվող երկրի վրա»,- նշեց Աշոտյանը։
ՀՀԿ փոխնախագահը շեշտեց՝ հասարակությունը պետք է պայքարի Միքայել և Բագրատ սրբազանների ազատության համար։
«Նույնը կարող եմ ասել Սամվել Կարապետյանի համար։ Նրանք հանրային հսկայական հեղինակություն ունեն, ավելի շատ մարդկանց ճակատագրական, հոգևոր, ֆինանսական, բարերարական բաներ են արել, քան այդ մարդկանց դատերին մարդ է հավաքվում։
Մենք աշխարհի ամենաառաջին քարիստոնյա ժողովուրդն ենք։ Կարո՞ղ է նաև աշխարհի ամենաապերախտ ժողովուրդն ենք դառնում։ Մենք աշխարհի ամենակարճ հիշողություն ունեցող ժողովո՞ւրդն ենք, թե ոչ։ Մենք աշխարհի ամենաուրացող ժողովո՞ւրդն ենք՝ հայրենիք, մարդկություն, արժեքներ»,- հարց հնչեցրեց Արմեն Աշոտյանը։
