Այն, ինչ տեղի է ունեցել օգոստոսի 8-ին (նկատի ունի Վաշինգտոնում Հայաստանի, Ադրբեջանի և ԱՄՆ-ի միջև կնքված համաձայնագիրը՝ խմբ.), ընդամենն այն է, որ Նիկոլ Փաշինյանը Մեղրին հանձնել է Ադրբեջանին և հրաժարվել է ԵԱՀԿ Մինսկի խմբից. դրա շահեկանը ո՞րն է, այսօր լրագրողների հետ զրույցում հարց հնչեցրեց Էդգար Ղազարյանը։
«Այսինքն՝ Մեղրին Ադրբեջանին հանձնելն այնքան շահեկա՞ն է, որ կարելի է գնալ ընտրությունների և ասել՝ տեսեք՝ ինչ լավ բան ենք արել, Արցախն Ադրբեջանին հանձնելուց հետո Մեղրին էլ ենք հանձնել, ԵԱՀԿ Մինսկի խումբն էլ։ Դրա շահեկանը ո՞րն է. հակառակը, այն, ինչ տեղի է ունեցել Վաշինգտոնում, մեր ժողովրդի համար ողբերգական փաստաթղթեր են»,- ասաց Ղազարյանը։
Անդրադառնալով 2026 թվականին կայանալիք ընտրություններին՝ Էդգար Ղազարյանը նկատեց՝ քանի դեռ Նիկոլ Փաշինյանն իշխանության ղեկին է, Հայաստանում ընտրությունը բացառվում է։
«Ոնց որ ընտրություն չի եղել 2018 թվականին, 2021 թվականին, այնպես էլ 26 թվականին չի լինելու։ Ընտրությունը ժողովրդավարական հասարակարգի ինստիտուտ է, այսինքն՝ միայն ընտրության օր հայտարարելով՝ չի նշանակում, որ այն, ինչ որ տեղի է ունենում, ընտրություն է։
Երբ ընդդիմադիր գործիչները միայն կարծիք արտահայտելու համար հետապնդումների են ենթարկվում, ո՞նց է հնարավոր այդ մթնոլորտում գնալ ընտրությունների։
Կարող են հայտարարել ընտրության օր և գնան հերթական իշխանազավթման։ Դրա համար իմպիչմենթի իմաստն այն է, որ Փաշինյանը մինչ այդ հեռացվի իշխանությունից, որպեսզի քաղաքական ուժերն, ըստ իրենց ազդեցության և վաստակի, կարողանան հավակնել ժողովրդի վստահությանը»,- ասաց Ղազարյանը։
Նա միաժամանակ հավանության արժանացրեց ԱԺ-ում իմպիչմենթի թեմայով առաջիկայում կայանալիք լսումները։
«Դա դրական քայլ եմ գնահատում։ Կարծում եմ՝ դա օգտակար քայլ է։ Կարծում եմ՝ բոլոր հնարավոր միջոցներով պետք է այդ ուղղությամբ աշխատանք տարվի՝ հասարակական աջակցություն ակնկալելու համար»,- ասաց Ղազարյանը։
Վերջում Էդգար Ղարյանն անդրադարձավ նաև իշխանությունների՝ Հայ Առաքելական եկեղեցու դեմ արշավին՝ նկատելով, որ որևէ մեկն իրավունք չունի միջամտելու Եկեղեցու գործունեությանը։
«Այն, ինչ մինչ այժմ Փաշինյանը հայտարարել է, ապօրինություն է։ Հիմա մամուլում կարդում ենք, որ փորձում են նաև Եկեղեցու ներսում պառակտումներ հրահրել և այս պահի դրությամբ ոնց որ մի անտեր հարամ են գտել այդ գործում ներգրավվելու համար (նկատի ունի տեր Արամին՝ խմբ.)»,- ասաց Ղազարյանը։
