Ուրիշներն են ասել, որ Փաշինյանն իմ հոգեզավակն է, ես այդպիսի բան ասե՞լ եմ, այսօր Մատենադարանում լրագրողների հետ զրույցում հարց հնչեցրեց ՀՀ առաջին նախագահ Լևոն Տեր–Պետրոսյանը։
Դիտարկմանը, որ 2008-ին Փաշինյանն իր կողքն էր կանգնած, առաջին նախագահը նկատեց. «Մեր կողքն այնքան մարդ էր կանգնած։ Այն ժամանակ շատ լավ էլ աշխատեցին բոլորը, Նիկոլն էլ»։
Հիշեցմանը, որ 2018–ին էլ ինքը դեմ չէր և չի քննադատել տեղի ունեցած հեղափոխությունը, Լևոն Տեր–Պետրոսյանն ասաց. «Հեղեղն ինչպե՞ս գնահատես։ Դա այնպիսի մի փոթորիկ էր, մարդը հաջողեց։ Մարդը ինչ նպատակ դրել էր՝ հասավ։ Դա պիտի գնահատես»։
Անդրադառնալով Փաշինյանի՝ ԼՂ խնդրի համատեքստում առաջին նախագահի թեզերը կրկնելու հանգամանքին՝ Լևոն Տեր-Պետրոսյանն ասաց.
«Այդ թեզերը նա կործանեց՝ Ստեփանակերտում հայտարարելով, որ «Արցախը Հայաստան է և վերջ» ու պատերազմ բերեց։
Նա միաժամանակ կեղծ համեմատություն որակեց պնդումը, թե Նիկոլ Փաշինյանը հենց իր խաղաղության օրակարգով է առաջ ընթանում։
«Դա կեղծ համեմատություն է. ոչ մի կապ չունի ղարաբաղյան իմ քաղաքականությունն իր քաղաքականության հետ։ Բացարձակապես ոչ մի կապ չունի»,- ասաց Տեր-Պետրոսյանը։
Նշենք, որ այսօր Մատենադարանում Լևոն Տեր–Պետրոսյանի 80–ամյակին նվիրված միջազգային գիտաժողով է կազմակերպվել։
