Վարչապետ Նիկոլ Փաշինյանի՝ պատվաստումների մասին հայտարարությունը հստակ ու նուրբ մեսիջ էր դատարաններին, որ հանկարծ չլինի մեկ դատավոր՝ այս հիմքով բերված ձերբակալություններն ու կալանավորումները մերժի։ Այս մասին NEWS.am-ի հետ զրույցում ասաց փաստաբան Ալեքսանդր Կոչուբաևը՝ անդրադառնալով այսօր կառավարության նիստում Փաշինյանի այն հայտարարություններին, որտեղ նա հանձնարարեց վարչական լծակներն օգտագործել, որ պատվաստման գործընթացն առաջ գնա:
«Այդ ելույթը հոգեհուզական պոռթկում էր։ Ցավոք սրտի, վերջին 3 տարում ձերբակալություններն ու կալանավորումները մեծամասամբ որոշվում են Կառավարությունում։ Եթե դա բերենք իրավաբանության դաշտ, ապա այդ հարցերի լուծումը բացառապես դատարանի մենաշնորհային իրավասությունն է։ Որևէ մեկը, ընդ որում ԱԱԾ-ն չի կալանավորողը, որևէ մեկը իրավասու չէ նմանատաիպ հանձնարարություններ տալ։
Այնպես չի, որ համատարած այդ խնդիրն ունեինք, որ այդ հարցը կառավարության նիստում քննարկվեր։ Որքան որ հետևել եմ մամլո հաղորդագրություններին, մեկ կամ երկու դեպք է։ Սա ընդամենը Կառավարության օրակարգի սնանկության մասին է խոսում։ Այսինքն՝ այդ մարդիկ հավաքվել են այնտեղ, ուրիշ ոչինչ չունեն անելու։ Կառավարության նիստերում քննարկվում է երկրի զարգացման ռազմավարական ուղղությունները, իսկ սա առողջ տրամաբանության մեջ չի տեղավորվում։
Սա պատվաստանյութերի վաճառքի միջազգային բլեֆի շարունակությունն էր, որի մեջ ընկղմված ենք նաև մենք։ Չի կարելի քաղաքացիների սահմանադրական իրավունքների ոտնահարման ճանապարհով այսպես ոստիկանությունով, ԱԱԾ-ով մարդկանց հաթաթա տալով պատվաստվել»,- նշեց փաստաբանը։
Այսօրվա նիստին Փաշինյանը նաև նշել է, որ պետական ապարատում բոլորը պետք է պատվաստված լինեն։
Կոչուբաևի խոսքերով՝ պետական ապարատում աշխատողն էլ ունի իրավունքներ, և վերջինս պետք է որոշի՝ պատվաստվե՞լ, թե՞ ՊՇՌ թեստ հանձնել։
