Նիկոլ Փաշինյանն իր հայտարարություններով անուղղակի ասում է՝ ինքն է հանձնել Արցախը, որպեսզի չունենանք ՀՀ պետականության և անկախության կորուստ, այսօր տեղի ուենցած մամուլի ասուլիսի ժամանակ ասաց ռազմական փորձագետ Հայկն Նահապետյանը։
«Այսինքն՝ ուզում է ասել՝ «Ես անկախությունն ու պետականությունը պահել եմ, որովհետև Արցախն եմ հանձնել»։ Սա խոստովանություն է կատարված պետական դավաճանության մասին։ Կարծում եմ՝ այս անձին պետական դավաճանության հոդվածով պետք է դատել և կապ չունի՝ այն ժամանակ նա որտեղ կլինի։ Սա ցանկացած նոր իշխանության առաջին գործն է լինելու։
Փաշինյանն իր կեցվածքով սադրել է պատերազմ, բերել կորուստներ, հայրենազրկում, Արցախի կորուստ, դրանից հետո՝ միջանցքի հանձնում, ռուսական բազայի դուրսբերում, ՌԴ տնտեսական լծակների՝ Հայաստանից հանում և Հայաստանի՝ թուրքական վիլայեթի վերածում։
Ես ուզում եմ, որ մեր զոհերի հարազատներն իմանան՝ թափված արյան համար ամբողջովին պատասխանատվություն է կրում Նիկոլ Փաշինյան կոչեցյալը և նրա քաղաքական թիմը։ Ընդ որում՝ նա գժի թղթով պատասխանատվությունից չի ազատվելու»,- ասաց Հայկ Նահապետյանը։
Ռազմական փորձագետն ընդգծեց՝ առաջին հարմար առիթի դեպքում ադրբեջանական տանկային շարասյունը որոշակի դիմադրությունից հետո Երասխից մի քանի ժամում կարող է հայտնվել Երևանում։
«Պաշտպանական ծախսերի կրճատումը, այն «բարդակը», որ բանակում է, սրա մասին են վկայում։ Մեր ժողովրդի գլխին Դամոկլյան սրի պես կախված է ցեղասպանվելու վտանգը»,- նշեց բանախոսը։
Հայկ Նահապետյանի խոսքով՝ հայտարարելով հանրային միջոցոռումներին, համերգներին բազմաթիվ քաղաքացիների ներկա գտնվելու մասին՝ Փաշինյանը կարծես ասում է՝ մորթվելուց առաջ հայ ժողովրդին «խաղաղություն» է բերել։
Անդրադառնալով Զանգեզուրի միջանցքի թեմային՝ ռազմական փորձագետը շեշտեց՝ Նիկոլ Փաշինյանը Հայաստանի տարածքը դարձնում է աշխարհի ուժային կենտրոնների բախման կիզակետ։
«Սա միջանցք է, ինչը նշանակում է, որ Թուրքիայից Նախիջևանով Ադրբեջան և հակառակ ուղղությամբ կարող է ցանկացած բեռ և մարդ տեղափոխվել՝ առանց ՀՀ պատկան մարմինների թույլտվության և իրազեկման»,- ասաց Հայկ Նահապետյանը։
