Եթե նայենք Ադրբեջանի հետ վերջին 8 տարվա մեր հարաբերությունները, անվտանգության տեսակետից դրանք եղել են միշտ ի վնաս Հայաստանի, Azg.am-ի թղթակցի հետ զրույցում ասաց էներգետիկ և անվտանգության հարցերով փորձագետ Արմեն Մանվելյանը՝ անդրադառնալով «Տելեկոմ Արմենիա» և «Ազերտելեկոմ» ընկերությունների ստորագրած երկկողմ համաձայնագրին, որը նախատեսում է երկու երկրների տարածքներով տարանցիկ ինտերնետի փոխանցում և մատակարարում՝ կոմերցիոն հիմունքներով։
«Մենք չենք կարող նույնիսկ մեկ օրինակ բերել, որից Հայաստանն օգտվել է. բոլոր նմանատիպ համաձայանգրերը միշտ վերջացել են Հայաստանի համար կա՛մ տարածքային, կա՛մ բարոյական, կ՛մ ֆիզիկական կորուստներով, կախվածության մեծացմամբ և այլն։ Այս նոր համաձայանգիրը ևս հայկական կողմի նկատմամբ որոշակի կախվածություն ստեղծելու քաղաքականություն է։
Ինտերնետի փոխանցումը մեզ վրա վաճառում են իբրև տարածաշրջանում «կապուղիների դիվերսիֆիկացում, հեռահաղորդակցության ցանցերի հուսալիության բարձրացում և տելեկոմ ոլորտում համագործակցության զարգացում», բայց սա իրականում ընդամենն ադրբեջանական կողմից կախվածություն է ստեղծում։ Ադրբեջանը հստակ կերպով այս քաղաքական գիծն է տանում՝ Հայաստանին դնելով տնտեսական, էներգետիկ, հիմա նաև՝ կոմունիկացիոն կախվածության մեջ։ Այստեղ ի օգուտ Հայաստանի կամ համատեղ որևէ գործողություն չկա»,- ասաց մեր զրուցակիցը։
Ըստ Արմեն Մանվելյանի՝ հայ-ադրբեջանական բոլոր գործարքները եղել են ի վնաս Հայաստանի. չի եղել գոնե մեկ գործարք , որից Հայաստանը կօգտվի։
Նրա համոզմամբ՝ երկկողմ գործարքը կայացել է ՀՀ իշխանությունների պահանջով։
«Բացառված չէ, որ օրերս Դիլիջանում կայացած հանդիպման ժամանակ է կախվածության մեծացման համար նման պահանջ դրվել (նկատի ունի ՀՀ անվտանգության խորհրդի քարտուղար Արմեն Գրիգորյանի և Ադրբեջանի նախագահի արտաքին հարաբերությունների գծով խորհրդական Հիքմեթ Հաջիևի հայաստանյան հանդիպումը՝ խմբ)։
Այս համաձայնագրում մեզ համար որևէ լավ բան չկա։ Պաշտոնական հաղորդագրության վերջին պարբերությունում շատ անորոշ և ընդհանուր ֆրազաներ են։ Իսկ մեր երկիրը հենց այդպիսի գեղեցիկ և անորոշ ֆրազաներով է մաս-մաս վաճառվում։ Սա շատ վտագավոր գործընթաց է. սա թելադրվում է Բաքվից և Բաքվի պահանջով էլ կատարվում է։
Հիմա ՀՀ իշխանությունները նաև ուզում են Սահմանադրությունը փոխել, բայց դա Բաքվի պահանջն է։ «Տելեկոմ Արմենիա»-ին ստիպել են. ցավալի է, բայց՝ փաստ։ Սա միանշանակ պարտադրանք է, սակայն որևէ ընկերության մասնավոր շահը չպետք է գերազանցի ազգային անվտանգությունը»,- ամփոփեց Արմեն Մանվելյանը։
Հիշեցնենք, որ «Տելեկոմ Արմենիա» և «Ազերտելեկոմ» ընկերությունները ստորագրել են երկկողմ համաձայնագիր, որը նախատեսում է երկու երկրների տարածքներով տարանցիկ ինտերնետի փոխանցում և մատակարարում՝ կոմերցիոն հիմունքներով։
