Այսօր ստորագրահավաքի 3-րդ օրն է. արդեն հավաքել ենք 6800 ստորագրություն, Հանրապետության հրապարակում լրագրողների հետ զրույցում նշեց Երևանի նախկին քաղաքապետ Հայկ Մարությանը։
Վերջինս, ինչպես հայտնի է, տրանսպորտի թանկացման դեմ ստորագահավաք է նախաձեռնել:
«Սա համարում եմ շատ լավ, մարդիկ շատ ակտիվ են, որովհետև խոսքն իրենց առօրյա կյանքի մասին է»,-ասաց Երևանի նախկին քաղաքապետը:
Հայկ Մարությանը նշեց, որ եթե ռեսուրս ունենային և տասը հազար հոգի դուրս գար ստորագրահավաք անելու, հարյուր հազարավոր մարդիկ կմիանային․ «Մարդկանց 95 տոկոսը դեմ է տրանսպորտի թանկացմանը»։
Դիտարկմանը, որ այսօրվա իշխանության շատ ներկայացուցիչներ նախորդ իշխանությունների ժամանակ՝ 2013-ին, պայքարում էին տրանսպորտի թանկացման դեմ, իսկ այսօր լուռ են, Մարությանը պատասխանեց.
«Այդ հարցի պատասխանը շատ պարզ է՝ իրենք իշխանության են, իրենք տաքուկ նստած են իրենց տեղերում, օգտվում են պետական թանկ մեքենաներից։ ԱԺ նախագահը կամ քաղաքապետը կարող են մեքենա ունենալ, բայց այդ մեքենաները պետք է ամենաէժան մեքենաները լինեն, որովհետև մեքենայի գնով կամ որակով չի որոշվում որևէ պաշտոնյայի դիրքը, անելիքը: Իրենք շատ լավ տեսնում են՝ ինչ է կատարվում, եթե ցանկություն ունենան՝ կմիանան ստորագրահավաքին»:
Նա միաժամանակ նկատեց՝ երբ իրենք ժամանակին սկսեցին տրանսպորտի ռեֆորմը, ոլորտը սուբսիդավորվում էր 2 մլրդ դրամի չափով։ «Հիմա մուտքերը վստահաբար շատացել են և վստահաբար կարելի է այնպես անել, որ տրանսպորտի վարձը մնա 100 դրամ: Պետք է համայնքը սուբսիդավորի տրանսպորտը, իսկ եթե չկարողանա, նաև պետությունը»,- ասաց Հայկ Մարությանը:
Նախկին քաղաքապետը նաև շեշտեց՝ ժամացույցի պես աշխատող աղբահանության հիմնարկը հիմա նորմալ չի աշխատում։
«Իրենք չեն ուզում խոստովանել, որ իրենք պարզապես չեն կարողանում կառավարել: Մեկը կարողանում է լավ վազել, մյուսը կարողանում է լավ երգել, մոյսւը ֆիզիկայով զբաղվել: Իրենք կարող է՝ մի ուրիշ բան են կարողանում լավ անել: Կառավարման տաղանդը իրենք չունեն:
Ես բազմիցս հայտարարել եմ, որ իմ օրոք Երևանի տրանսպորտը չի թանկանալու: Ոչ մի կորելաացիա չպետք է լինի տոմսի գնի և նրա միջև, թե որքան է դա նստում: Տրանսպորտը սոցիալական հարց է լուծում, սա բիզնես չի, համայնքը չպետք է փող աշխատի: Պետք է սուբսիդավորի պետությունը կամ համայնքը, որովհետև մեզ մոտ տրանսպորտից օգտվում են մարդիկ, որոնք այլ տարբերակ չունեն»,- ամփոփեց Հայկ Մարությանը:
