Երբ խոսվում է համերաշխության մասին, ինձ մոտ տպավորություն է ձևավորվում, որ համերաշխությունը ներկայացված է որպես մի բուտաֆորիա, լրագրողների հետ այսօր կայացած հանդիպման ժամանակ ասաց Գերաշնորհ Տեր Արշակ արքեպիսկոպոս Խաչատրյանը:
«Համերաշխությունը խոր բարոյական, հոգևոր ու գաղափարական ընդհանրությունների ամբողջություն է։ Այդպիսի ընդհանրություններ այսօր մենք հասարակության մեջ չունենք։ Չեմ վիճի, որ այդ համերաշխությունը ձևավորելու հարցում եկեղեցին մեծ առաքելություն ունի։ Շատ տարբեր խմբեր ուղղակի խանգարում են այդ համերաշխության ձևավորմանը, այդ թվում՝ նաև իշխանությունը»,-շեշտեց հոգևորականը։
Արշակ եպիսկոպոս Խաչատրյանի խոսքով՝ ցանկացած հեղափոխություն հրապարակ է նետում անհամերաշխության հսկայական չափաբաժին։
«Կամա-ակամա ստեղծվում են բարիկադներ։ Երբ 2018 թվականին տեղի ունեցան քաղաքական հայտնի իրադարձությունները, անկեղծորեն ասած՝ դրանք ինձ մոտ մեծ վախեր էին առաջացնում։ Վախեր էին առաջացնում ոչ միայն անորոշության առումով, այլ, որովհետև կամա-ակամա ստեղծվում էին դիմակայություններ, որոնք կարճ ժամանակում դուրս չեն գալիս։ Մենք ունեցանք պատկեր, երբ ընտանիքում ազգականները միմյանց հետ չէին շփվում։ Երբ մենք փորձում ենք հասկանալ, թե դա ինչից էր, դժբախտաբար, գնում ենք դեպի 2018 թվական»,- ասաց նա։
