ՔՊ-ն իշխանության գալուց հետո առաջին անգամ պատրաստվում է ԱԺ հերթական ըհնտրությունների։ 2021 թվականին ունեցել ենք արտահերթ ընտրություններ, երբ հապճեպ կազմվել է ցուցակ։ Այժմ մեզ համար նոր իրավիճակ է ստեղծվել, և մենք ցուցակըը հապճեպ չենք որոշելու, այսօր լրագրողների հետ զրույցում ասաց իշխանական պատգամավոր Հայկ Սարգսյանը։
«300-380 հոգի հայտ են ներկայացրել այս պահին, կարծում ենք՝ կլինի մոտավորապես 300-350 թեկնածու, և կուսակցության 1100 պատվիրակները կորոշեն, թե ով որ համարը պետք է լինի»,- ասաց պատգամավորը։
Հայկ Սարգսյանը պատմեց, որ կուսակցությունն իրեն էլ հրավիրել է, ինչպես մյուս թեկնածուներին, և կարճ քննարկման ընթացքում իրեն տեղեկացրել են, որ վարչությունը որոշել է մերժել իր առաջադրումը։
«Այս պահին ես ունեմ երկու ճանապարհ՝ գնալ տուն և չլինել հաջորդ ցուցակում և երկրորդ՝ բողոքարկել վարչության որոշումը՝ իրացնելով իմ կուսակցական իրավունքները։ Ես ընտրել եմ երկրորդ ճանապարհը. ես բողոքարկելու եմ վարչության որոշումը։ Սա անում եմ իմ գաղափարակից ընկեր վարչապետ Նիկոլ Փաշինյանի և իմ համար։
Վերջին վեց տարիներին զբաղվել եմ օրենսդրական գործունեությամբ։ Ըստ իս՝ կուսակցության համագումարը պետք է որոշի՝ ով որ համարը պետք է լինի ցուցակում։ Ես ցանկանում եմ, որ վարչությունն ինձ հնարավորություն տա՝ առաջադրվեմ, ոչ թե ֆիքսվի իմ տեղը ընտրական ցուցակում, և կուսակցության անդամները որոշեն՝ ես կլինե՞մ անցողիկ տեղում, թե կլինեմ օրինակ 350-րդ համարը և չեմ լինի ԱԺ-ում։ Ես ոչ թե ցանկանում եմ ունենալ անցողիկ տեղ, այլ ցանկանում եմ իրացնել իմ իրավունքը՝ որպես հիմնադիր կուսակցական»,- ասաց Հայկ Սարգսյանը:
