Երկարատեւ հիվանդությունից հետո մահացել է մերօրյա գրատպության ամենավաստակաշատ դեմքը՝ «Տիգրան Մեծ» հրատարակչության գլխավոր տնօրեն Վրեժ Մարկոսյանը:
Տպագրական նոր տեխնոլոգիաների՝ Հայաստան ներմուծման և կիրառման ասպարեզում անգնահատելի ծառայություններ մատուցած մի անձնավորություն, որին երախտապարտ են մնալու ոչ միայն անհատ հեղինակներն ու կազմակերպությունները, այլև տպագիր մամուլի խմբագիրներն ու տնօրենները։
Արդարև, առանց Վրեժ Մարկոսյանի արտակարգ ձեռներեցության ու կազմակերպված աշխատանքի, անհնար է պատկերացնել թերթերի և ամսագրերի հրատարակումը Հայասատնում, հատկապես անկախության առաջին՝ դժվարագույն տարիներին։
«Ազգը» խորապես վշտակցում է հարազատներին և գործընկերներին։
Վրեժ Մարկոսյանը 73 տարեկան էր. ծնվել է 1950թ. մարտի 15-ին Ապարանում: Աշխատանքային գործունեության ընթացքում արժանացել է տարբեր պարգեւների, այդ թվում՝ Հայ առաքելական եկեղեցու «Սուրբ Գրիգոր Լուսավորիչ» բարձրագույն շքանշանով (2006թ.), Թեքեյան մշակութային կենտրոնի «Ադամանդակուռ Արարատ» շքանշանով (2007թ.), «Հայրենիքին մատուցած ծառայությունների համար» 2-րդ աստիճանի մեդալով (2010թ., ՀՀ):
Հոգեհանգիստը տեղի կունենա հունվարի 13-ին՝ ժամը 18։00-ին, հուղարկավորությունը՝ հաջորդ օրը, ժամը 14։00-ին, Սուրբ Հովհաննես Մկրտիչ եկեղեցում։
