ԱԺ-ում կառավարության հետ հարցուպատասխանի ժամանակ, պատասխանելով պատգամավորների հարցերին, Նիկոլ Փաշինյանն ասել է, որ նոյեմբերի 26-ին Սոչիում Ռուսաստանի եւ Ադրբեջանի նախագահների հետ հանդիպմանը տրանսպորտային հաղորդակցությունների ապաշրջափակման հարցում փոխըմբռնում է ձեռք բերվել։
Փաշինյանը հավելել է, որ հետագայում ադրբեջանական կողմը խախտել է ձեռք բերված պայմանավորվածությունները։ Նա, մասնավորապես, մեկնաբանել է Ադրբեջանի նախագահ Իլհամ Ալիեւի վերջին հայտարարությունները, թե հայկական կողմը պետք է նշի այսպես կոչված «Զանգեզուրի միջանցքի» բացման ժամկետները։
«Սոչիում մենք փոխըմբռնում ունեինք, եւ ես հաստատում եմ այն ամենը, ինչի մասին խոսել եմ այն ժամանակ։ Իմ բոլոր ասածները նախօրեին հաստատվեցին Հայաստանի արտաքին գործերի նախարարության հայտարարության մեջ։ Ես այդ դիրքորոշումն եմ արտահայտել, եւ որոշակի պայմանավորվածություն է ձեռք բերվել հենց այդ դիրքորոշման շուրջ»,-ասել է նա:
