Բաքվի զինվորական դատարանում, դատավոր Զեյնալ Աղաևի նախագահությամբ, տեղի է ունեցել Ադրբեջանում ապօրինի պահվող՝ Արցախի ռազմաքաղաքական ղեկավարների շինծու գործերով դատական նիստը։
Ըստ ադրբեջանական ԶԼՄ-ների՝ նիստին մասնակցել են իբրև թե ՛՛տուժողներ, նրանց իրավահաջորդներն ու ներկայացուցիչները՛՛, պետական մեղադրողները, ինչպես նաև Նախարարների կաբինետի ապարատի ղեկավար Ռուֆաթ Մամեդովը՝ որպես ադրբեջանական պետությունը ներկայացնող տուժող։
Նշվում է, որ դատական հաջորդ նիստը տեղի կունենա փետրվարի 7-ին։ Այսօր ավելի վաղ տեղի էր ունեցել նաև Արցախի նախկին պետնախարար Ռուբեն Վարդանյանի շինծու գործով նիստը, որն անջատ է քննվում։
Նրա փաստաբան Ավրաամ Բերմանը միջնորդել է իր պաշտպանյալի հետ առանձին հանդիպման մասին։ Դատարանը բավարարել է միջնորդությունը։ Ընդմիջումից հետո դատախազն ընթերցել է մեղադրական եզրակացության եզրափակիչ մասը։
Ինչպես հաղորդվում է՝ հաշվի առնելով մեղադրական եզրակացության ծավալը՝ դրա ընթերցումը կշարունակվի փետրվարի 10-ին նշանակված հաջորդ դատական նիստին։
