Կարծում եմ՝ պրոցեսները միգուցե այնպիսի իրավիճակի են հասել, որ նույնիսկ նախարարը չի կարողացել այլ ելք գտնել, քան հրաժարականը։ Այս մասին այսօր՝ մայիսի 31–ին, լրագրողների հետ ճեպազրույցում ասաց «Հայաստան» դաշինքի ներկայացուցիչ Արամ Վարդեւանյանը՝ անդրադառնալով Արա Այվազյանի՝ ԱԳ նախարարի պաշտոնից հրաժարական տալուն։
«Ես չեմ կարող սա դիտարկել հերոսական քայլ, բայց կարող եմ ասել, որ, եթե համեմատենք այլ պաշտոնյաների հետ, օրինակ՝ իրավապահ ոլորտի ներկայացուցիչների, սա կոնկրետ քայլ է, եւ, միգուցե, հանրության որոշ զանգվածի համար ազդակ կարող է լինել։ Միգուցե պետք էր ավելի շուտ նման գործողություն կատարել։ Իրենց կողմից նախարար նշանակված Արա Այվազյանը հրաժարական է ներկայացնում՝ ասելով, որ այս իշխանությունները ՀՀ շահերին դեմ են գնում։ Դուք հասկանու՞մ եք՝ դա ինչ ազդակ է։ Չափազանց վատ է, որ մենք նման դրության մեջ ենք, բայց «Հայաստան» դաշինքի ծրագրային կարեւորագույն դրույթներից մեկը հենց այն է, որ այս վիճակում ՀՀ-ն այլեւս երբեք չհայտնվի»,-ասաց նա։
Լրագրողների դիտարկմանը, որ եթե իշխանությունների գործողությունները հակասում են պետական շահին, կա ԱԱԾ, ուժային կառույցներ, որոնք պետք է զբաղվեն այդ հարցով, Վարդեւանյանն ասաց․ «Այն ամենը, ինչ տեղի ունեցավ 3 տարիների ընթացքում ԱԱԾ-ի նկատմամբ, թույլ է տալիս շատ վստահ պնդել, որ նման ակնկալիք չպետք է ունենալ ԱԱԾ-ից։ Ցավոք, նման կարեւոր կառույցը քաղաքականացվեց ու սատանաներ եւ ՀԴՄ կտրոններ որոնող կառույցի վերածվեց։ Երբ նոյեմբերի 9-ի փաստաթուղթը մեր հանրության կողմից մանրամասն ուսումնասիրվի, հարց կառաջանա, թե ինչու ռազմագերիների վերադարձի հարցը լուծված չլինելով՝ մեր հայրենիքի հողերը հանձնելու մասը շատ հստակ իրականացվում է։
Աբսուրդ է խոսել, թե նա որեւէ կերպ մտածում է ՀՀ շահերի մասին»։
Նիկոլ Փաշինյանի մամուլի խոսնակ Մանե Գեւորգյանն Արա Այվազյանին հորդորել է ապացույցներ ներկայացնել, թե ինչն է հակապետական եղել։ Անդրադառնալով այս հայտարարությանը, Վարդեւանյանն ասաց, որ խոսնակը, կառավարության շենքում մի քանի սենյակ անցնելով, կարող է գտնել այդ ապացույցները, քանի որ իր հարցադրման հասցեատերը իր անմիջական ղեկավարն է։
News.am
