ՍԴ-ում գործի քննությունն իրականացնելու պարագայում առաջին խնդիրը պատշաճ ընթացակարգով իրականացնելն է, որի նկատմամբ հսկողությունը պետք է ինքներս ներկայացնենք։ Պետք չէ ցավագին ընդունել դատավորներից մեկի առաջարկությունն այդ ընթացակարգերի պահպանման վերաբերյալ, որովհետև մեզ հետևում է ամբողջ երկիրը, գնահատականներ են տրվելու և ինքներս պետք է այդ ընթացակարգերը պահպանենք, որ մեր ապագա որոշումը որևէ մեկի կողմից չքննադատվի և խոցելի չլինի։ Այս մասին ՍԴ-ում հայտարարեց ՍԴ դատավոր Հրայր Թովմասյանը։
Ինչպես արդեն տեղեկացրել ենք՝ ՀՀ նախագահին որպես վկա ներգրավելու մասին միջնորդությունը մերժվել է ՍԴ-ի կողմից, իսկ դատավոր Արևիկ Պետրոսյանը պարզաբանում է պահանջել, թե ինչ ընթացակարգով է նման որոշում կայացվել։ Պետրոսյանի այս հայտարարությանն արձագանքել էր Վահե Գրիգորյանը, ինչից հետո բանավեճ էր սկսվել։
Հրայր Թովմասյանը ևս մեկ անգամ միջնորդեց՝ ՀՀ նախագահին որպես վկա հրավիրելու և լսելու մասին։ Թովմասյանը նշեցմ, որ գործով երեք դիմողները բարձրացրել են հարց, որի պատասխանը ոչ պատասխանողները, ո՛չ հարակից պատասխանողները չեն կարող պատասխանել, ինչը գործի ելքի համար էական նշանակություն ունեցող հանգամանք է, ավելին՝ Թովմասյանը ներքին համոզմունք ունի առ այն, որ կասկածներ չունի, որ դատավորին հարկադրվել է, պարտադրվել է, բայց դատարանը պետք է անդրադառնա և գնա առաջ։ Թովմասյանը նշեց, որ արդյունավետության տեսանկյունից պետք էր նախորդ նիստին ասել, որ նախագահը կողմ չէ, փակել հարցը և քննարկումը չշարունակել, այլ ոչ թե գնալ խորհրդակցական սենյակ, ինչի մասին Թովմասյանն իրազեկված չի եղել, մինչդեռ խորհրդակցական սենյակում խնդիրը կարող էր ուղղվել։
ՍԴ նախագահ Արման Դիլանյանն էլ հայտարարեց, որ ՍԴ-ն՝ իր բոլոր գործողություններում և որոշումներում առաջնորդվում է միայն օրենքով և Սահմանադրությամբ։
«Որևէ մեկը, առավել ևս, ՍԴ դատավորները, պարտավոր են ձեռնպահ մնալ հրապարակայնորեն կասկածի տակ առնելու այդ որոշումը կամ գործողությունները։ Երբ որ դատարանը կայացրեց որոշում, նշանակում է դատարանն այդ հարցը լուծեց, դատավորների մեծամասնությունը որոշեցին, որ այդպես է, մենք պարտավոր ենք դա ընդունել ի գիտություն, ուզենք, թե չուզենք, հակառակ մեկնաբանությունը բերելու է պարզապես անարխիայի ու այդ դատավարությունը վերածվելու է ֆարսի»,- նշեց Դիլանյանը։
Դիլանյանի՝ դիտարկումներից հետո դատավոր Պետրոսյանը նկատեց, որ օրենքով սահմանված կարգով վարքագծի հետ կապված, ապա ՍԴ գործողությունները և դատական իշխանությունը վարկաբեկող համապատասխան տեսակետներ և մեկնաբանություններ ՍԴ դատավորներից մեկը մեկ տարի և ավել շարունակ վարքագիծ դրսևորել է և ինքը չի տեսել ՍԴ նախագահի կողմից նման հետևողականություն։
Վահե Գրիգորյանն էլ արձագանքեց՝ նշելով, թե դատավոր Պետրոսյանն իրեն է ակնարկում, ՀՀ քաղաքացիներից ներողություն է խնդրում այն ամենի համար, ինչին ականատես է և կարծում է, որ ՀՀ-ն արժանի է ավելի լավ ՍԴ-ի։ Զեկուցող դատավոր Էդգար Շաթիրյանը հորդորեց՝ անհապաղ ավարտել բանավեճը, անցնել գործի բուն քննությանը, հակառակ դեպքւոմ՝ հանրությունն արդեն տևական ժամանակ դիտում է ներքին բանավեճը։
Հիշեցնենք, որ ՍԴ-ում քննարկվում է արտահերթ խորհրդարանական ընտրությունների արդյունքներն անվավեր ճանաչելու մասին քաղաքական ուժերի կողմից ներկայացված դիմումները՝ մեկ վարույթով։ ՍԴ-ի կողմից արդեն իսկ սահմանվել է դիմումների ներկայացման հաջորդականությունը, համաձայն որի՝ առաջինը բացատրությամբ հանդես կգան դիմումատուները, հետևյալ հաջորդականությամբ՝ «Հայաստան» «Զարթոնք», «Հայոց Հայրենիք», «Պատիվ ունեմ» դաշինքը, ապա՝ պատասխանող կողմը՝ ԿԸՀ-ն, հարակից պատասխանողները և երրորդ անձը՝ Քաղաքացիական պայմանագիր կուսակցությունները։
Փաստ ինֆո
