Գտնվում ենք անցումային փուլում, որտեղ անհրաժեշտ է ձևակերպել՝ ինչ հանգրվանից ենք շարժվել և դեպի ուր ենք գնում։ Այսօր կանգնած ենք բարդ և պատասխանատու խնդրի առաջ. անհրաժեշտ է անցում կատարել դեպի տեխնոլոգիական ինքնիշխանություն, այսօր կայացած կլոր սեղանի ժամանակ հայտարարեց ԳԱԱ նախագահ Աշոտ Սաղյանը։
«Սա նշանակում է ունենալ ռազմավարական ուղղություններով ամրագրված սեփական գիտատեխնոլոգիական կարողություններ։ Մոտ ապագայում մեր գլխավոր խնդիրը պետք է դառնա գիտության զարգացման ռազմավարական ծրագրի կատարմանն ուղղված իրատեսական մեխանիզմների մշակումը։
Գիտության զարգացման ռազմավարության հրատապությունը ոչ մեկի մոտ կասկած չի առացնում, այսօր բոլորս գիտակցում ենք գիտության որոշիչ դերը պետության պաշտպանունակության զարգացման գործում։ Դրա ականատեսը եղանք 44-օրյա պատերազմում, Ուկրաինայում և Իրանում, որտեղ բարձր տեխնոլոգիական արդյունքներն են որոշում ամեն ինչ»,- նշեց ԳԱԱ նախագահը։
Աշոտ Սաղյանը միաժամանակ ուշադրություն հրավիրեց այն հանգամանքի վրա, որ 2022 թվականից սկսած՝ մինչև 35 տարեկան գիտնականների թվաքանակն սկսել է դինամիկ աճել. մասնավորապես, 2025-ին՝ 2022-ի համեմատ, նրանց թիվն աճել է 16 տոկոսով։
ԳԱԱ նախագահը նաև շեշտեց՝ իրենք լուրջ խնդիրներ ունեն հրատարակությունների հարցում, և բավարար թվով գիտական ամսագրեր չունենալու պատճառով հայ որոշ գիտնականներ հոդվածներ են տպագրում այնպիսի երկրների գիտական ամսագրերում, որոնց գիտական մակարդակը շատ ցածր է ՀՀ գիտական մակարդակից։
«Դա, իհարկե, մեր մեղքն է, և ինչ-որ տեղ նույնիսկ ամոթ է։ Պատկերացրեք՝ Ադրբեջանն ունի Scopus համակարգում ներառված 18 ամսագիր։ Այն Ադրբեջանը, որը ԽՍՀՄ տարիներին ԽՍՀՄ գլխավոր ակադեմիայում ընդամենը մեկ ակադեմիկոս ուներ, որն ի պաշտոնե իրենց ակադեմիայի պրեզիդենտն էր, իսկ մենք ունեինք ԽՍՀՄ գլխավոր ակադեմիայի 18 հայազգի անդամ։ Սա մեր ամենահրատապ խնդիրներից է, և նպատակ ենք դրել 2027 թվականին ունենալ առնվազն 3 ակադեմիական ամսագիր՝ ներառված Scopus համակարգում»,- ամփոփեց Աշոտ Սաղյանը։
