ՀՀԿ փոխնախագահ Արմեն Աշոտյանը հայտարարել է, որ առաջիկա խորհրդարանական ընտրություններին չի մասնակցում որպես պատգամավորի թեկնածու՝ իր նախաձեռնությամբ, սակայն ընդգծել է, որ ակտիվորեն ներգրավված է «Պատիվ ունեմ» դաշինքի ընտրական շտաբի աշխատանքներում։
Նա նշել է, որ ի սկզբանե դեմ է եղել արտահերթ ընտրությունների կազմակերպմանը։
«Կարծում եմ՝ ընտրական գործընթացները լուծում չեն Հայաստանի համար այն ճգնաժամային իրավիճակում, որում մենք հայտնվել ենք: Ընդդիմադիր բոլոր ուժերով չպետք է թույլ տայինք, որպեսզի այս ընտրությունները տեղի ունենան։ Ընտրությունները չպետք է լինեին, բայց այս ընտրություններին չօգնելը, չներքաշվելը չմասնակցելը հիմա համարում եմ սխալ»,- ֆեյսբուքյան ուղիղ եթերում հայտարարել է Արմեն Աշոտյանը եւ տեղեկացրել, որ 44-օրյա պատերազմից զորացրվելուց հետո երրորդ նախագահ Սերժ Սարգսյանի հետ զրույցում ասել է, որ ընտրություններում իրեն չդիտարկի որպես առաջադրվող թեկնածու:
«Պատերազմից հետո իմ դիրքորոշումը մնացել է նույնը, պատերազմը ինձ շատ է փոխել, շատերիս մտածելակերպը, առարկայական մոտեցումը կյանքին, առաջնահերթությունները, զգացմունքներն ամբողջությամբ վերանայվել են, եւ, ես էլ բացառություն չեմ: Պատերազմը, զինվորական ծառայությունն ինձ վրա մեծ դրոշմ են թողել եւ ես այնպիսին եմ ինչպիսին որ Հայաստանի ազնիվ, արդար սրտացավ մտածող բնակչության 99 տոկոսը»,-ասել է Ա. Աշոտյանը՝ նշելով, որ իր անձնական որոշումն է՝ չառաջադրվել «Պատիվ ունեմ» դաշինքի նախընտրական ցուցակով։
«Շնորհակալ եմ կուսակցության ղեկավարին՝ Սերժ Սարգսյանին, որ հարգել է իմ այդ որոշումը»,- նշել է ՀՀԿ փոխնախագահը ու ավելացրել, որ շատ մրցունակ ցուցակ են ներկայացրել եւ կոչ արել իր համախոհներին ընտրել «Պատիվ ունեմ» դաշինքը՝ անկախ նրանից ինքը եւ Շարմազանովը կան ցուցակներում, թե ոչ։
«Ես չեմ առաջադրվում, բայց պատրաստվում եմ կրծել ցանկացած շակալի, շնագայլի կոկորդը, որը կփորձի նորից թուրքական յաթաղանը քաշել հայկական ինքնության գոյության վրա»,- հայտարարել է Աշոտյանը՝ ապա խոսքն ուղղելով Փաշինյանին նշել է. «բռնվիր դավադիր կապիտուլյանտ: Չթեկնածու լինելով՝ ես, Շարմազանովը եւ մնացածը քեզ համար ավելի վտանգավոր ենք լինելու»։
Տեսանյութը դիտեք այս հղումով ՝ https://www.youtube.com/watch?v=wcAyB0_ayK8&ab_channel=PastinfoTV
