Քանի որ հայտարարությունը եղել է հրապարակային, ես կարծում եմ, որ մեր իրավապահ մարմինները դրանով պետք է զբաղվեն, լրագրողների հետ հանդիպման ժամանակ ասաց Երևանի քաղաքապետի խոսնակ Հայկ Կոստանյանը՝ անդրադառնալով բլոգեր Արթուր Չախոյանի այն հրապարակմանը, որտեղ նա պնդում է, որ մանկապարտեզների մրցույթներից մեկում մի ընկերություն է շահել, բայց քաղաքապետարանից ճնշումներ են գործադրել՝ ստիպելով հրաժարվել ի օգուտ «Լիլանարմ» ընկերության։
«Ես տեսել եմ էդ ռեպորտաժը, բայց նայեք, բայց մեկնաբանելու համար ես առնվազն գոնե էն մարդկանց, ում մեղադրանք է ներկայացնում, պետք է գոնե էս պահին Երևանի քաղաքապետարանում աշխատեին, որպեսզի ես կարողանայի իրենցից էդ մասով պատշաճ մեկնաբանություն ստանալ, որովհետև էն պաշտոնյաների անունը, որ տալիս է, դրանք քաղաքապետարանի նախկին աշխատակիցներ են։ Ես կդժվարանամ էդ մասով որևիցե ինֆորմացիա տալ, որ այո, նման բան եղել է, կամ ոչ, նման բան չի եղել։ Այդ առումով ես կարծում եմ, որ ավելի ճիշտ կլինի այն մարդկանց անունները, որ տեսանյութում տրվում է, իրենցից էլ պարզաբանումները ստանալ»,- նշեց բանախոսը։
Լրագրողները հետաքրքրվեցին՝ քաղաքապետարանը ներքին քննություն չի՞ սկսել այդ հայտարարության մասով, ինչին Կոստանյանը պատասխանեց.
«Հանրային խոսք է հնչել, եթե մենք բոլորս լսում ենք դա, մենք մտածում ենք, որ ուրեմն սա քրեական գործի պատրաստ թեմա է։ Ես կարծում եմ, քանի որ հայտարարությունը եղել ա հրապարակային, մեր իրավապահ մարմինները դրանով պետք է զբաղվեն։ Հիմա ինչքան էլ մենք մեր մեջ քաղաքապետարանում հասկանանք, որ այո, նման բան եղել է, թե նման բան չի եղել, քանի որ հրապարակային է, ես կարծում եմ, որ իրավապահ մարմինները պետք է գնան այդ հայտարարության հետևից և վերջնարդյունքում պարզեն՝ դա իրականությանը համապատասխանում է, թե ոչ»։
