Հայաստան–ՌԴ առևտրաշրջանառության թիվը ուռճացված չէր. ոսկու շրջանառություն էր տեղի ունենու, որից Հայաստանը չուներ ոչ մի օգուտ, այդ թիվը զրո էլ դառնա, մեր տնտեսական աճի վրա դրա ազդեցությունը մոտ զրո է, այդ թիվը դառնա 100 անգամ շատ, էլի դրա ազդեցությունը մեր տնտեսական աճի վրա մոտ զրո է։ Այսօր ԱԺ–ում լրագրողների հետ զրույցում այս մասին ասաց էկոնոմիկայի նախարար Գևորգ Պապոյանը։
«Այդ պրոդուկտը գալիս էր Հայաստան, հետո գնում էր մեկ այլ երկիր։ Ինքը ֆորմալ, վիճակագրական առումով թիվ է։ Ռուսաստանի համար դա էական արդյունք է, որովհետև ինքը բան է արտահանում, Արաբական Միացյալ Էմիրատների համար արդյունք է, որովհետև ինքը ստանում է, իսկ մեզ համար ինքը ընդամենը վիճակագրական թիվ է։
Ասենք, 1-2 հոգի մաքսային հայտարարագիր էին լրացնում, մեկն էլ Զվարթնոցից բերում էին այնտեղ Փարաքարում մի հատ տեղ կար, գողություն տեղի ունեցավ։ Մեկ էլ որոշ տեղափոխողներ կարող է իրենց եկամուտներ են ստացել, որոնք տնտեսության վրա ունեցել են զրոյին մոտ ազդեցություն։ Իրենց անձնական կյանքի վրա որոշակի ազդեցություն ունեցել են, բայց իրենք այդ մեծ շրջանառության մեջ այնքան փոքր բաներ են, որոնք ընդհանուր հանրային բարիքի վրա սահմանափակ ազդեցություն են ունեցել։ Կարող է մեկը դրա հետևանքով ռեստորան է բացել, բայց տնտեսության վրա ազդեցություն չի ունեցել»,–ասաց նա։
Անդրադառնալով այն հանգամանքին, որ Փաշինյան–Պուտին հանդիպմանը տարաձայնություն եղավ երկու երկրների առևտրաշրջանառության ծավալների առումով, Պապոյանը նկատեց՝ ՀՀ ազգային վիճակագրական ծառայությունը հրապարակում է թվեր՝ ընդունված մեթոդաբանությամբ՝ արդեն 30 տարի։
«Հիմա թե որտեղ ինչպես են հաշվում, ես չեմ կարող ասել կամ որտեղ ինչ թվեր կան։ Մենք այլ բան չենք էլ կարող հրապարակել. եթե վիճակագրական ծառայությունը ասի մի միլիարդ է, պիտի ասենք՝ մի միլիարդ է, ասի 11 է՝ կասենք 11 է»։
Դիտարկմանը, որ գուցե կա «սև դրամարկղ», և Պուտինը այդ թվերն է նաև հաշվարկել, որ ծավալը մեծ է ներկայացրել, Պապոյանն ասաց. «Ես այդպիսի բաներից չեմ հասկանում։ Երևի դուք հասկանում եք, դրա համար այդպիսի հարցեր եք տալիս»։
