Այսօր պետք է ցավով արձանագրենք, որ 2020 և 2023 թվականները աղետալի հետևանքներ ունեցան մեր բանակի վրա, որովհետև ՀՀ գործող վարչախումբը և նրա պարագլուխ Նիկոլ Փաշինյանն ամեն ինչ արեցին, որպեսզի Հայաստանում կայացած եզակի ինստիտուտներից մեկը՝ մեր հաղթնակած բանակը, ուղղակի կործանվի, Azg.am-ի թղթակցի հետ զրույցում ասաց քաղաքագետ Գագիկ Համբարյանը։
«Կործանման այդ գործընթացը շարունակվում է նաև այսօր՝ ավելի լկտի և ավելի մասշտաբային։ Պետք է նշենք, որ Նիկոլ Փաշինյանն ի սկզբանե ատել է Վազգեն Սարգսյանին. դեռ նրա ողջության օրոք իր թերթում Փաշինյանը զրպարտիչ, վարկաբեկիչ և անձնական վիրավորանքներ պարունակող հոդվածներ էր հրապարակում։
Հետագայում էլ նա չի թաքցրել իր հակակրանքը զինվորականների և հատկապես առաջին արցախյան պատերազմում հաղթանակ տարած հրամանատարների նկատմամբ, թիրախավորել է այդ մարդկանց և ամեն ինչ արել՝ իր թերթով ազդելու հասարակության վրա, հակակրանք սերմանելու հաղթանակած հրամանատարների նկատմամբ»,- ասաց քաղաքագետը։
Ըստ Գագիկ Համբարյանի՝ Նիկոլ Փաշինյանի կողմից բանակը նսեմացնելու և վարկաբեկելու քայլերից էր նաև Սուրեն Պապիկյանին Պաշտպանության նախարար նշանակելը։
«Նա ժամանակին դատվել է բանակում ծառայելու ժամանակ իր հրամանատարին դանակահարելու համար։ Դա գիտե՞ք՝ ինչի է դա նման. երբ, օրինակ, մանկապիղծին բերում և նշանակում են մանկապարտեզի կամ մանկատան տնօրեն։ Փաշինյանը դիտավորյալ է բանակում հանցագործություն գործած, դրա համար դատապարտված անձին նշանակել Պաշտպանության նախարար»,- ասաց մեր զրուցակիցը։
Վերջում Գագիկ Համբարյանն ընդգծեց՝ Զինված ուժերն այսօր ծառայում են բացառապես Նիկոլ Փաշինյանին, իսկ վերջինս էլ ամեն ինչ անում է, որպեսզի վերջնականապես հողին հավասարեցնի ՀՀ զինված ուժերը։
«Որովհետև դա նրանից պահանջում է թուրք-ադրբեջանական տանդեմը։ Ադրբեջանի նախագահը գոնե վերջին երկու տարվա ընթացքում բացահայտ ասում է, որ Հայաստանը չպետք է բանակ ունենա. ՀՀ բանակը իրենից պետք է ներկայացնի ավելի շատ ոստիկանական գործառույթներ ունեցող մի կազմավորում, որը չի ունենա հարձակողական ռազմական տեխնիկա, ՀՕՊ համակարգ։
Հայկական բանակի վերջնական ոչնչացման ծրագիրը դրված է Նիկոլ Փաշինյանի վրա, որն էլ դա փայլուն կատարում է։ Նա կատարում է թուրք-ադրբեջանական տանդեմը այն պահանջը, որ Հայաստանը բանակ չպետք է ունենա։ Փաշինյանը ելակով կերակրեց մեր զինվորներին, վերջում էլ տարավ նրանց մեծ մասին մատաղ արեց Արցախում, սպանեց 44-օրյա պատերազմի ժամանակ»,- եզրափակեց քաղաքագետը։
