Հայաստանը Պրահայում ճանաչել է իր սեփական տարածքը, դրանով պահպանել է Հայաստանի Հանրապետությունը գաղութացումից, ծայրագավառ դառնալուց և իշխանությունը կորցնելուց: Ով խոսում է Պրահայի մասին բացասական տրամադրվածությամբ, ուզում է, որ Հայաստանի Հանրապետությունն անկախ երկիր չլինի, այսօր լրագրողների հետ զրույցում ասաց ԱԺ նախագահ Ալեն Սիմոնյանը։
«Մենք Պրահայում ոչ թե Ադրբեջանի տարածքն ենք ճանաչել, այլ մեր տարածքն ենք ճանաչել, որովհետև Հայաստանը սկսվում է այնտեղ, որտեղ ավարտվում է Ադրբեջանը»,- ասաց նա:
ԱԺ նախագահ Ալեն Սիմոնյանը միաժամանակ հարց ուղղեց լրագրողներից մեկին, թե ինչու է վերջինս «Արցախ» անունը գործածում։
«Ուզում եմ հասկանալ՝ այդ դեպքում ինչո՞ւ եք վատ զգում, երբ Հայաստանի Հանրապետության ինչ-որ տարածքներին ադրբեջանական անվանումներ են տալիս, ենթադրենք Սևանին ինչ որ մեկը այլ անվանում է տալիս»,- ասաց Սիմոնյանը։
Դիտարկմանը, թե Սիմոնյանն ինքն էլ, ժամանակին կիրառում էր Արցախ անվանումը, ԱԺ նախագան ընդգծեց ՝ սխալ էր անում:
«Այդ դեպքում ես ձեզ խնդրում եմ՝ վատ մի զգացեք, որ ինչ-որ երկրում, ինչ-որ մարդ կարող է Երևանին ասել Էրիվան, Սևանին ինչ-որ այլ բան ասել»,- ասաց ԱԺ նախագահը։
Երբ լրագրողները նկատեցին, որ Սևանը մերն է, Սիմոնյանը հակադարձեց՝ Ղարաբաղն էլ Ադրբեջանինն է։
Ցույց տալով Հայաստանի քարտեզով իր կրծքանշանը՝ նա նկատեց՝ այդ քարտեզի արևմուտքում Թուրքիան է, Արևելքում՝ Ադրբեջանը, Հարավում՝ Իրանը, իսկ հյուսիսում Վրաստանը, և Ջավախքն էլ Հայաստան չէ, այլ Վրաստան է։
«Քանի դուք նման բաներ եք ասում, մի զարմացեք, որ մեզ դրա դիմաց ասելու են Զանգեզուր, Սևանին Գյոյչա են ասում»,- նշեց Սիմոնյանը։
