Ժողովրդավարական երկրներում կան ընթացիկ հաշվարկներ, հարցումներ, տեսակարար կշիռներ, և ի վերջո կան բազմաթիվ ընտրական տեղամասեր, որտեղ արդյունքներն ամփոփված են, և կան բանաձևեր, թե ինչքան կարող են իջնել ընտրական տոկոսները։ Մենք դեռ իջնելու էլի տեղ ունենք, որպեսզի արձանագրենք, որ ընտրությունները միանշանակ հաղթել ենք, այսօր տեղի ունեցած ճեպազրույցի ժամանակ հայտարարեց Նիկոլ Փաշինյանը։
Լրագրողներից մեկը հետաքրքրվեց որոշ պետական մարմինների՝ ձևական գործելու մասին, այն է՝ եթե ընտրությունների արդյունքները դեռ չհրապարակված՝ ՔՊ առաջնորդը շտապեց հայտարարել սեփական հաղթանակի մասին և բացի այդ՝ նախընտրական շրջանում իրավապահներին հանձնարարում էր ում կալանավորել, ում՝ոչ, ապա այդ դեպքում ավելի ճիշտ չէ՞ր լինի խնայել պետբյուջեից ԿԸՀ-ին և իրավապահ մարմիններին տրվող 500 մլն դրամը։
«Ամբողջ աշխարհում սովորական պրակտիկա է, որովհետև կան հարցումներ, ընթացիկ քվեարկության հաշվարկներ, և ի վերջո կան բազմաթիվ ընտրատեղամասեր, որտեղ արդյունքներն ամփոփված են, կան բանաձևեր, թե ինչքան կարող է ընտրական տոկոսը։ Մենք հլը իջնելու էլի տեղ ունենք, որպեսզի արձանագրենք, որ միանշանակ հաղթել ենք։ Ցանկացած ժողովրդավարական երկրում դուք նման հայտարարություններ կտեսնեք և ոչ մի տեղ չեք լսի հարց, թե ինչի համար է ԿԸՀ-ն։ ԿԸՀ-ն նրա համար է, որ իր արդյունքներով կա՛մ հաստատի, կա՛մ հերքի քաղաքական գործիչների հայտարարությունները»,-ասաց Փաշինյանը։
Լրագրողը նաև հիշեցրեց Նիկոլ Փաշինյանի այն հայտարարությունը, որ եթե ՔՊ-ն սահմանադրական մեծամասնություն չկազմի, երեք ամսից պատերազմ կլինի։ Արդյոք լինելու է պատերազմ, հարց ուղղեց նա, ինչին ի պատասխան՝ Փաշինյանը նկատեց.
«Քանի մենք խաղաղության օրակարգը շարունակելու ենք, և սպասարկելու ենք բոլոր հնարավոր միջոցներով, պատերազմ չի լինելու. լինելու է խաղաղություն»։
Իսկ արդյոք դուրս է գալիս սահմանադրական փոփոխություններ կատարելու օրակագը, թե հանրաքվե անցկացնելու այլ տարբերակներ կան։
«Կդիտարկենք իրավիճակը և կգանք հետևությունների»,- պատասպխանեց Փաշինյանը։
