Չի անցնում գոնե մեկ շաբաթ, որի ընթացքում չկատարվի այնպիսի քաղաքական իրադարձություն, ինչը կապացուցի՝ Նիկոլ Փաշինյանը շարունակում է իր տված խոստումները կյանքի կոչել: Լրագրողների հետ զրույցի ժամանակ այս մասին ասաց «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով Հայաստանի օդային տարածքով իրականացված Բաքու-Նախիջևան-Բաքու չվերթին:
«Երբ ասում ենք, որ փաստացի ՀՀ-ն դարձել է այս տարածաշրջանում ուղղակի վարչատարածքային միավոր, այլ ոչ թե սուբյեկտ, ասում են՝ մի չափազանցրեք իրականությունը: Հիմա ունենք միջպետական ճանապարհ, որն ուղղակի զավթված է և իշխանությունները փորձում են որպես սահմանային փոքրիկ միջադեպ դա ներկայացնել: Մեզ համար հիմա ինֆորմացիայի աղբյուր է հանդիսանում մեր թշնամական պետության տրամադրած տեղեկատվությունը, ինչը խայտառակություն է»,-ասաց պատգամավորը:
Աննա Մկրտչյանը նշեց, որ ՄԱԿ-ի ելույթում Նիկոլ Փաշինյանը խուսափեց խոսել այն մասին, որ պատերազմի ժամանակ եղել են վարձկաններ, մեզ ապացույցներ էին ներկայացնում, բայց այնտեղ այդ ապացուցողական բազայից ոչինչ չօգտագործեց:
«Նիկոլ Փաշինյանը չի ցանկանում անգամ օգտագործել միջազգային հանրության այն օղակները, որոնք կարող են ներգործություն ունենալ Հայաստանի սուբյեկտայնության պահպանման մեջ»,-նշեց Աննա Մկրտչյանը:
Աղբյուր` Փաստինֆո
