ԱՄՆ վարչակազմը Վրաստանի կառավարությանը և մասնավոր հատվածին կրկին զգուշացրել է նրանց դեմ ԱՄՆ-ի միակողմանի պատժամիջոցների կիրառման հնարավորության մասին՝ կապված Վրաստանի և Ռուսաստանի միջև ուղիղ օդային հաղորդակցության վերականգնման հետ։
«Ինչ վերաբերում է Վրաստանում ռուսական ինքնաթիռներին, ապա շատ արևմտյան երկրներ, այդ թվում՝ ԱՄՆ-ն, արգելում են ռուսական ինքնաթիռների մուտքն իրենց օդային տարածք։ Մեզ մտահոգում է Ռուսաստանի և Վրաստանի միջև ուղիղ չվերթերի վերականգնումը։ Սա կարող է նշանակել, որ ընկերությունները, վրացական օդանավակայանները կարող են հայտնվել արևմտյան պատժամիջոցների սպառնալիքի տակ»,- լրագրողների հետ հերթական ճեպազրույցում ասել է Պետդեպարտամենտի մամուլի ծառայության ղեկավար Մեթյու Միլլերը։
«Հիմա Ռուսաստանի հետ համագործակցություն զարգացնելու ժամանակը չէ»,- պնդել է ամերիկյան արտաքին քաղաքականության գերատեսչության ներկայացուցիչը։
Հիշեցնենք՝ օրեր առաջ ՌԴ նախագահ Վլադիմիր Պուտինը վերացրել էր ռուսական ավիաընկերությունների համար Վրաստան թռիչքների արգելքը։ Մայիսի 15-ից Վրաստանի քաղաքացիների համար վիզային ռեժիմը չեղարկվել է։ Առայժմ ռուսական ավիաընկերություններից Վրաստան թռչելու իրավունք է ստացել միայն «Ազիմուտ»-ը։ Թբիլիսի, Բաթումի և Քութայիսի թռիչքների թույլտվություն է խնդրել Վրաստանի իշխանություններից առնվազն չորս ռուսական ավիաընկերություն։
