Հայկական «Քոչարին» Ադրբեջանը «Յալլի» անվան տակ ներկայացրել է ՅՈՒՆԵՍԿՕ-ին

2017-ին Հայաստանի ներկայացրած «Քոչարի. ավանդական խմբապարը» (“Kochari, traditional group dance”) ՅՈւՆԵՍԿՕ-ի Ոչ նյութական մշակութային ժառանգության պահպանման հարցերով միջկառավարական կոմիտեի 12-րդ նստաշրջանում ընդգրկվեց Մարդկության ոչ նյութական մշակութային ժառանգության ներկայացուցչական ցանկում՝ լավաշի, դուդուկի, Սասնա Ծռեր էպոսի կողքին․․․

Այսօր ՅՈւՆԵՍԿՕ-ի պաշտոնական էջերում, այդ թվում ՝ twitter, facebook սոցիալական ցանցերում տարածվում է նկար՝ այսպիսի գրառումով․

«Yalli (Kochari, Tenzere), traditional group dances of Nakhchivan-Յալլին/Քոչարի, Թանզարան/՝ որպես Նախիջևանի ավադական խմբային պար»։

Սա հայկական մշակութային ժառանգության յուրացման, փաստերի խեղման և հայկական հետքերը ջնջելու հերթական քայլն է. նկատում է «Հայաստան» խմբակցության պատգամավոր Լիլիթ Գալստյանը։

Փաստորեն, Նախիջևանյան հայկական պարային ավանդույթը՝ մեր ծիսական «Քոչարի» պարը Ադրբեջանը «Յալլի» անվան տակ հայտ է ներկայացրել և գրանցել ՅՈւՆԵՍԿՕ-ի Ոչ նյութական մշակութային ժառանգության` անհապաղ պաշտպանության ցանկում։

«Իսկ «Քոչարին» միայն Նախիջևանին բնորոշ չէ, այն հայկական հինավուրց ծիսական պար է, և հենց որպես այսպիսին է 2017-ին այն գրանցել ՅՈՒՆԵՍԿՕ-ն։

Յուրացրել և ցեղասպանել են Նախիջևանը, հիմա՝ մշակութային հետքերի վերացման, սեփականացման կամ զեղծարարության ժամանակն է․․․

Ի՞նչ են մտածում ՀՀ ԱԳՆ-ն, ԿԳՄՍ նախարարությունները։

Գրեթե անիմաստ հարց․․․

Պետությունդ պիտի ազգային լինի, որ պաշտպանի․․․»,- ցավով նշում է Լիլիթ Գալստյանը։

ՅՈՒՆԵՍԿՕ-ի գրառման մեջ նշված է. «Ռիթմիկ քայլերով և գունեղ տարազներով Յալլին մարմնավորում է ադրբեջանական կենդանի Ժառանգության էությունը»: