ԱՄՆ նախագահ Դոնալդ Թրամփի՝ վաղը հրավիրած հանդիպումը Հայաստանի ու Ադրբեջանի առաջնորդների հետ կավարտվի խաղաղության շրջանակային համաձայնագրի ստորագրմամբ, որով ԱՄՆ-ն բացառիկ իրավունքներ կստանա Հարավային Կովկասով ռազմավարական տարանցիկ միջանցքի նկատմամբ: Այս մասին տեղեկացնում է Reuters-ը՝ հղում անելով իր աղբյուրներին՝ ԱՄՆ պաշտոնյաների, որոնք ցանկացել են անանուն մնալ:
Այսպես՝ պաշտոնյաները Reuters-ին հայտնել են, որ այդ շրջանակային համաձայնագիրը հնարավորություն կտա հասնել «խաղաղության կոնկրետ ուղու», ինչպես նաև լուծել տևական ժամանակ քննարկվող տարանցիկ ճանապարհի հարցը։
«Ադրբեջանը խնդրել է տրանսպորտային միջանցք՝ Հայաստանի տարածքով Նախիջևանին կապվելու համար»,-հավելել են նրանք։
Reuters-ը նշում է, որ Ադրբեջանը Նախիջևանին կապող այս ճանապարհը գործարկվելու է Հայաստանի օրենսդրության համաձայն: «Միացյալ Նահանգները հողը ենթավարձակալության կհանձնի կոնսորցիումի՝ ենթառուցվածքների ու կառավարման համար»։ Թե ինչ կոնսորցիումի մասին է խոսքը, չի հստակեցվում։
Հաղորդվում է նաև, որ առաջնորդների կողմից ուրբաթ օրը ստորագրվելիք փաստաթղթի մանրամասն բանակցված բաժնում Հայաստանը ծրագրում է ԱՄՆ-ին տալ տարանցման միջանցքի զարգացման բացառիկ իրավունքները՝ երկար ժամանակահատվածով, սակայն չի հստակեցվում, թե քանի տարով: Միայն նշվում է, որ այն կոչվելու է «Թրամփի ճանապարհ՝ միջազգային խաղաղության և բարգավաճման համար»։ Ըստ պաշտոնյաների՝ այն հայտնի կլինի TRIPP հապավումով:
Reuters-ն ընդգծում է, որ TRIPP-ը տնտեսական ու առևտրային նախաձեռնություն է. «Ամերիկան չի տալիս կոշտ անվտանգային երաշխիք և չի տեղակայում ուժեր ճանապարհին»։
Reuters-ը պնդում է, որ դեպի եռակողմ հանդիպում տանող այս առաջընթացը սկսվել է մարտից, երբ ԱՄՆ հատուկ բանագնաց Սթիվ Ուիթքոֆն այցելել է տարածաշրջան։ Ըստ գործակալության՝ հետագայում նաև Ուիթքոֆի թիմի անդամներն են մի քանի անգամ եղել Հարավային Կովկասում՝ համաձայնագրի կնքմանը նպաստելու համար։
Բացի դրանից՝ ամերիկացի պաշտոնյաները պնդում են, որ ԱՄՆ պաշտոնյաները հույս ունեն, թե Հայաստանի հետ խաղաղության ուղղությամբ այս հանդիպումը կարող է հիմք դառնալ, որ Ադրբեջանը միանա Աբրահամի համաձայնագրերին, որոնք Թրամփի վարչակազմը համարում է առաջնահերթություն և գործիք՝ այս կամ այն երկրի հետ տնտեսական ու պաշտպանական համագործակցության խորացման համար։
