Հայաստանն այսօր ունի 26 տոկոս ինքնիշխանություն, այնքան, որքան մեզ տրամադրել են TRIPP-ից մասնաբաժին ունենալ։ Այսօր տեղի ունեցած ճեպազրույցի ժամանակ նման տեսակետ հայտնեց ԱԺ «Հայաստան» խմբակցության պատգամավոր Արմեն Ռուստամյանը։
«Քո տարածքով անցնում է ճանապարհ… Ոչ մի վետոյի իրավունք էլ չունենք։ Իրականում, թե ինչ ուղղությամբ է այս ամենը գնում, պետք է կարողանանք տեսնել։
Այսինքն՝ ակնհայտ է. քո տարածքով ճանապարհ ես տալիս, բայց այդ տարածքի տնօրինությունն ունես միայն 26 տոկոսով։ Այսինքն՝ 74 տոկոսը տալիս ես իրենց՝ 49 տարով, հետո ևս 50 տարի դրան գումարվելու է, և եթե որևէ մեկը կասկածում է, որ ամերիկյան ամբողջական վերահսկողությունը և ամերիկյան լիարժեք գործընթացն իրականացնելն ինչ-որ սահմանափակում է ունենալու, թող նայի, տեսնի, թե ինչպես է ԱՄՆ-ը վարվում ուրիշների հետ։ Հայաստանն ինչպե՞ս կարող է վետոյի մասին ծպտուն հանել»,- հարց հնչեցրեց ընդդիմադիր պատգամավորը։
Ըստ Արմեն Ռուստամյանի՝ իշխանությունների ասելով՝ մենք արդեն իսկ ունենք մեր երազած Հայաստանը, որը պետք է գովերգենք։
«Բայց տեսնեում ենք՝ ինչ պետության մասին ենք այսօր խոսում։ Այսօր Հայաստան, որպես պետություն, չկա։ Կա Նիկոլ Փաշինյանի կալվածք, որն ինքը տնօրինում է»,- նշեց նա։
Դիտարկմանը, որ ՀՀ գործող իշխանությունները TRIPP-ի 26/74 հարաբերակցությունը բացատրում են ամերիկյան կողմի՝ 74 տոկոս ներդրումներով, Արմեն Ռուստամյանն ասաց՝ նման բան չի կարող լինել։
«Չի կարող այնպես լինել,, որ ճանապարհը քո տարածքոշվ անցնի, և գոնե կես-կես չլինի։ Սա մեզ այն աստիճանի նվաստացնող բան է, որ հնարավոր չէ ասել։ Ինչի՞ց են սկսել բանակցել, որ հասել են 26 տոկոսի։ Պարոն օսկանյանը շատ լավէ մեկնաբանել. եթե լուռ նստեինք այնտեղ, կարող է մի քիչ ավելի լավ վիճակում լինեինք»,- ասաց պատգամավորը։
Ի պատասխան իշխանության ներկայացուցիչների այն պնդումների, որ նախկին իշխանությունները «գույք պարտքի դիմաց» գործարքով ընկերություններ են տվել Ռուսաստանին, որոնք 100 տոկոսով են դարձել ռուսական, Ռուստամյանն ասաց.
«Բազմիցս բացատրվել է, թե ինչքան օգուտ է տվել Հայաստանին «գույք պարտքի դիմացը», այսօր էլ ապացուցվում է, որ այն գործարանները, որոնք չէին աշխատում, առնվազն սկսեցին շնչել։
Իրենք այնքան բաներ են աղավաղում. իրենց ասելով՝ մենք մինչև 2018 թիվը լրիվ սխալ ենք ապրել, ընդհանրապես որպես ազգ, և 2018 թվից իրենք մի հատ պայծառ ապագա են մեզ բերել, որ տեսնում ենք՝ այդ ապագան ինչ է տալիս։ Մենք անընդհատ զիջելով գալիս ենք։
Մենք սուբյեկտ չենք բանակցությունների, մենք օբյեկտ ենք։ Մենք սեղանի վրա ենք, մենք սեղանի շուրջ չենք։ Մենք այնտեղ նստում ենք ձևական բուտաֆորիայի նման, բայց մնացածները որոշում են, թե մեզ ինչ տան, ինչ կրճոններ մեզ տրամադրեն։
Այդ փաստաթղթում իրավական ուժ ունեցող որևէ բան չկա։ Կա իրավական ուժ ունեցող մեկ այլ բան, որը այդ ստորագրած հինգ կետերից մեկն է, որ անխոչընդոտ պետք է կապ ապահովվի Ադրբեջանի երկու մասերի միջև։ Դրա հետ կապված մանրամասնություններ կան և դեռ լինելու են։
Ասում են՝ մենք այնտեղ ներկա ենք լինելու, սահմանապահ, անձնագրեր են մենք ստուգելու, սահմանապահություն ենք անելու, մաքսային մենք ծառայություններն ենք անելու, բայց խորամանկորեն գրել են՝ «ֆրոնտ օֆիս», «բեք օֆիս» հասկացությունները։ Սա ի՞նչ է նշանակում. մենք լինելու ենք բեք օֆիսում նստած, ֆրոնտ օֆիսը կորոշի ամերիկյան այդ կազմակերպությունը, և կապահովվի Ալիևի պահանջը, այսինքն՝ իրենք չպիտի տեսնեն հայ ոստիկանի կամ հայ սահմանապահի դեմք։
Այն ինչ որ լսում ենք մեր հարևաններից՝ թուրք-ադրբեջանական տանդեմի կողմից, դրանք իրականացվում են, ինչ որ լսում ենք հայկական կողմից, դրա հակառակն է տեղի ունենում»,– շեշտեց Արմեն Ռուստամյանը։
