Անողոք հիվանդությունը, 70 տարեկանում, մեզնից խլեց հայ ժամանակակից լրագրության ճարտարապետներից, իսկ հայկական դիվանագիտությունըՙ իր բանիմաց գործիչներից մեկին։
Համլետ Գասպարյան. «Ազգ»ի հիմնադիրներից, թերթի անփոխարինելի գործադիր խմբագիր, հայոց լեզվին հրաշալի տիրապետող, քաղաքական եզրաբանությունների մասնագետ, որը քաջ տիրապետում էր նաեւ ֆրանսերեն լեզվին։ 1996 թ.ից նա անցել էր պետական ծառայության. ՀՀ արտգործնախարարության կազմում որոշ ժամանակ ծառայելուց հետո որպես դեսպանության քարտուղար աշխատանքի էր անցել Ֆրանսիայում ՀՀ դեսպանությունում, թրծվել դեսպան եւ ապա արտգործնախարար Էդ. Նալբանդյանի հովանու ներքո, ապա նշանակվել արտակարգ եւ լիազոր դեսպան Ռումինիայում, որտեղ պաշտոնավարել էր շուրջ հինգ տարի։ 2018 թ., արտակարգ եւ լիազոր դեսպանորդ-նախարարի կարգավիճակով ընդգրկվել էր ՀՀ նախագահ Արմեն Սարգսյանի աշխատակազմում որպես խորհրդական։
Խոհուն, սթափ, ազգային-պետական հարցերում ռեալիստական ուղղության հետեւորդ, քաղաքական արկածախնդրությունը կտրականապես մերժող անձնավորություն էր Համլետ Գասպարյանը, որի նմանները, ափսոս, հետզհետե անհետանում են մեր պետական ծառայության տիրույթում։
Ավելի քան 40 տարվա լրագրողական, հասարակական ու դիվանագիտական գործունեության ընթացքում Համլետ Գասպարյանը բացի «Ազգ»ից խմբագրել է նաեւ մի շարք պարբերականներ, գրքեր, ֆրանսերենից թարգմանել Շառլ Ազնավուրի երգերի տեքստերից կազմվածՙ թերեւս լավագույն հատընտիրը, մեծ երգչի մասին գրել մի շարք ակնարկներ, նրա հետ անցկացրել մի քանի հարցազրույց։
«Ազգ»ի խմբագրությունը սգում է նրա կորուստը եւ վշտակցում տիկնոջըՙ Հասմիկին, զավակներին ու մյուս հարազատներին եւ գործընկերներին։
Հոգեհանգստյան եւ հուղարկավորության արարողությունների մասին կտեղեկացնենք ավելի ուշ։
ԱԶԳ
