Համարձակվում եմ այսպիսի ենթադրություն կամ կանխատեսում անել. այն հոդվածը, որով իրենք միջնորդել են, որպեսզի անձեռնամխելիությունից զրկվի Արթուր Սարգսյանը, հետո կալանավորել են, այս հոդվածը, որ ՀՅԴ երիտասարդների վրա է, իրենք իսկ իրենց առաջադրած հոդվածը փոխելու են՝ ահաբեկչության կազմակերպումը։ Այս մասին այսօր լրագրողների հետ զրույցում նշեց «Հայաստան» խմբակցության պատգամավոր Քրիստինե Վարդանյանը։
«Ես ուղղակի հիշեցնեմ, որ անգամ 2016 թվականին, երբ ՊՊԾ գունդը գրավվել էր, ոստիկաններ էին սպանվել, պատանդ էին վերցրել, անգամ այդ դեպքում ահաբեկչության հոդված չդրվեց, որովհետև դա ծանրագույն հանցագործություն է և իրեղեն ապացուցողական բազան, այդտեղ պիտի շատ ծանր լինի։ Ես բերել եմ զեղչի ու բանկային քարտեր, որը երեկ քննչականը ներկայացրել է որպես իրեղեն ապացույց ահաբեկչության պատրաստման։ Շապիկները, Սթրայքբոլի առարկաները ևս ներկայացվել են որպես ահաբեկչության իրեղեն ապացույց: Սա ծիծաղելի է և այո, կանխատեսվում է, որ իրենք էլ չեն կարողանալու իրենց առաջադրած մեղադրանքները ապացուցել: Յոթ անձ է հիմա ձերբակալված և այդ մարդկանց խնդիրը ուղղակի այն է եղել, որ Անդրանիկ Չամիչյանի հետ հեռախոսով խոսել են:
Անդրանիկ Չամիչյանին ապօրինի կալանքի են տարել, բացել են հեռախոսը, պատահականության սկզբունքով վերցրել են, ով մտածել են դաշնակցության հետ ավելի կազմակերպական կապ ունի, ինքը դաշնակցությունում կազմակերպական պարտականություն ունի, որպեսզի կարողանան դա կառույցի վրա տարածել, մտել են խուզարկել են տունը և ազատությունից զրկել են 72 ժամով։
Սա իրենց պետք է եղել երեկվա այդ ֆոնը ապահովելու համար և կառույցին ահաբեկչության մեջ մեղադրելու համար։ Դրա համար էլ Հասմիկ Հակոբյանը հնչեցրեց, որ Դաշնակցությունը պետք է փակել։
Ես ուզում եմ պաշտոնապես հայտարարել, որ որևէ ահաբեկչություն երբեք ոչ միայն չենք պլանավորել, չենք էլ պլանավորելու, որովհետև չեք կարող գտնել մի դեպք, երբ ՀՅԴ-ն իր զենքը, բռուցքը ուղղել է ազգի ներսին, ուղղել է հայի դեմ։ Այն միշտ ուղղված է եղել հայ ազգի թշնամիներին»,-նշեց Վարդանյանը։
Անդրադառնալով ՔԿ այն հայտարարությանը, որ ոչ միայն խաղալիքներ են առգրավվել, այլ նաև այլ իրեր, Քրիստինե Վարդանյանը հավաստիացրեց՝փաստաբաններից ստացել են տեղեկություն, որ որևէ ապօրինի գույք չի հայտնաբերվել։
«Քննչականը հետո ասել է, որ փորձաքննություն է իրականացվել ու վերջին ձերբակալվածի՝ Ալիկ Ասատրյանի տանը հայտնաբերել է մեկ չեզոքացված, այսինքն ոչ մարտական վիճակի F1 նռնակ։
Բայց այդ նռնակով հնարավոր չի իրականացնել այն հանցակազմը, որը վերագրվում է։ Եթե մեղադրանքը այն է, որ դաշնակցականներից մեկի տանը մի նռնակ են հայտնաբերել, կարող են դրանով մեղադրանք առաջադրել, բայց ի՞նչ մեղադրանք կարող են առաջադրել։ Եթե մեղադրանքը այն է, որ մենք ահաբեկչություն ենք նախապատրաստել կառույցով, դա չի համապատասխանում իրականությանը։ Իրենց իսկ հայտնաբերած իրեղեն ապացույցները վկայում են, որ դրանով չէին կարող կազմակերպել այն, ինչում մեղադրում են»,- նշեց պատգամավորը։
Նա միաժամանակ ընդգծեց, որ եթե հիմա քննչականը կամ ԱԱԾ–ն իրական ահաբեկչություն բացահայտեն, այնքան են անլրջացրել և քաղաքականացրել այս թեման, որ մարդիկ չեն էլ հավատալու, որ այդպիսի բան է բացահայտվել։
«Եթե Հայաստանում կա խմբակ, որը ահաբեկչություն է իրականացնում սեփական ժողովրդի նկատմամբ, դա իսկապես այս իշխող վարչախումբն է։ Տեղեկատվական ահաբեկչության մեջ ենք ապրում։ Ես շատ կարևորում եմ, որ մենք մեր գործողություններով ցույց տանք, որ Հայաստանի բանտերը ռեզինից չեն, այնտեղ բոլոր դժգոհները չեն տեղավորվելու, արդեն իսկ տեղի խնդիր ունեն իրենք բանտերում։ Ես շատ կարևորում եմ շարունակել հնչեցնել սուր խոսքը, պայքարի օջախները վառ պահել, որպեսզի ցույց տանք, որ այո, իրենք հարվածում են, բայց այդ հարվածներից վախեցողները չկան»,–ամփոփեց ընդդիմադիր պատգամավորը։
