Մոտ մեկ ժամ է՝ լուրեր են պտտվում, որ Արցախի Հանրապետության պետնախարար Ռուբեն Վարդանյանը կազատվի զբաղեցրած պաշտոնից։
Սոցցանցերում տեղեկությունը շրջանառում են նաև քաղաքագետները, վերլուծաբանները։
Նշենք, որ պաշտոնական հարթակներում հաստատված տեղեկություն չկա սրա մասին։ Ռուբեն Վարդանյանի հրաժարականի մասին տեղեկության ոչ հավաստի սկզբնաղբյուր որոշ դեպքերում նշվում է «հավաստի աղբյուրը»՝ «Հայկական ժամանակը»։
Քաղաքական, հանրային գործիչները նույնպես տարակուսած են այս լուրից՝ հրաժարականի պատճառներն անորոշ են, բայց՝ ենթադրելի՝ քաղաքական հիմքերով։
Ինչպես հայտնի է, Ռուբեն Վարդանյանը Արցախի պետնախարար նշանակվեց 2022 թվականի նոյեմբերի 4-ին, և լուրեր էին տարածվում, որ նա եկել է Արցախում իշխանությունն իր ձեռքը վերցնելու։
Հիշեցնենք, որ Ադրբեջանը դժգոհ էր, որ Ռուբեն Վարդանյանն Արցախի պետնախարարն է, այդ երկրի արտգործնախարար Ջեյհուն Բայրամովը հայտարարել էր, թե նա ինչքան շուտ հեռանա, այնքան լավ կլինի բոլորի համար։ Ադրբեջանական կողմից հնչել էր համոզմունք, թե Ռուբեն Վարդանյանը «Ռուսաստանի մարդն է»։ Անմիջապես հետո ՌԴ արտգործնախարար Սերգեյ Լավրովը հայտարարեց, թե Վարդանյանը Ռուսաստանի հետ որևէ առնչություն չունի։
Ինչևէ, թեև պաշտոնական տեղեկություն չկա Ռուբեն Վարդանյանի պաշտոնանկության մասին, բայց դժվար չէ կռահել, որ այս ամենից, մեղմ ասած, լավ հոտ չի գալիս։
Նաիր Յան
