ՌԴ նախագահի մամուլի քարտուղար Դմիտրի Պեսկովը չի մեկնաբանել Հայաստանի վարչապետ Նիկոլ Փաշինյանի հայտարարությունները Բաքվի կողմից առաջ մղվող «Արևմտյան Ադրբեջան» ծրագրի վերաբերյալ։
«Ցավոք, ոչինչ չեմ կարող ասել, քանի որ պետական մակարդակով ծանոթ չեմ Ադրբեջանի այդ հայտարարություններին, մենք լսել ենք բոլորովին այլ հայտարարություններ Ադրբեջանի ղեկավարությունից, որոնք խոսում են մեկ ծրագրի ավարտի և անհրաժեշտության մասին՝ պատրաստ լինել խաղաղության պայմանագրի կնքմանը, հետևաբար, պարոն Փաշինյանի հայտարարության այս հատվածի մասին կոնկրետ որևէ բան չեմ կարող ասել»,- հավելել է Պեսկովը։
«Փաշինյանն ասել էր, որ Ադրբեջանի որոշ քայլերից տպավորություն է ստեղծվում, որ այդ երկիրը պատրաստվում է նոր ռազմական գործողությունների Հայաստանի դեմ։ Ըստ Հայաստանի վարչապետի՝ Ադրբեջանում պաշտոնական մակարդակով Հայաստանի Հանրապետությունը սկսել է կոչվել Արևմտյան Ադրբեջան»,-նշում են ադրբեջանական լրատվամիջոցները՝ փաստորեն, իրենց միամիտի տեղ դնելով, թե իրենք նկրտումներ ունեն Հայաստանի ինքնիշխան տարածքի հանդեպ։
Մինչդեռ 2020 թվականից ի վեր Ալիևի հովանու տակ ստեղծվել է «Արևմտյան Ադրբեջան» արհեստածին կազմակերպություն-համայնքը, որի անդամներն իրենց համարում են Հայաստանի, իրենց հորջորջմամբ՝ «Արևմտյան Ադրբեջանի» քաղաքացիներ ու պահանջում իրենց վերադարձնել «իրենց ծննդավայր-հայրենիքը»։
Սրա մասին գիտեն ԱՄՆ-ում և Արևմուտքում։ Եվ այդ կողմերից եկող քաղաքական հոսանքներն Ադրբեջանին պարբերաբար կծում-կսմթում են, թե ՀՀ ինքնիշխան տարածքի նկատմամբ ոտնձգությունները չենք հանդուրժի, ախորժակդ մի քիչ չափավորի։
Պեսկովը չի՞ լսել «Արևմտյան Ադրբեջանի» մասին։
