Նիկոլ Փաշինյանի և նրա կողակցի՝ Աննա Հակոբյանի իրականացրած «Կրթվելը նորաձև է» ծրագիրն իրականացվում է պետական բյուջեի հաշվին։
Ծրագրի ֆինանսական հատկացման մասին ԱԺ-ում լսումների ժամանակ ասել է վարչապետի աշխատակազմի ղեկավար Արայիկ Հարությունյանը։
Նա հավելել է, թե այդ շարժումը Նիկոլ Փաշինյանի առաջնահերթ ծրագրերից է։
Ակնհայտ է, որ պետբյուջեի հաշվին իրականացվող «Կրթվելը նորաձև է» ծրագիրը նախընտրական քարոզարշավ է։ Փաստորեն Փաշինյանն ու Հակոբյանը ՀՀ քաղաքացիների հարկերի հաշվին պատրաստվում են 2026 թվականի ընտրություններին՝ ներկայացնելով մի ծրագիր, որը հայտնի չէ՝ ինչ փորձաքննություն է անցել, մասնագիտական ինչ գնահատական է ստացել։
Ո՞վ է երաշխավորել ու հաստատել այդ ծրագիրը, որի համար ծախսվում են ՀՀ քաղաքացիների հարկերը, որը ներկայացվում է պետական հաստատություններում՝ տեղափոխությունների համար օգտագործելով նաև պետական ռազմական գույք, օրինակ՝ ուղղաթիռ։ Որևէ արտոնված մասնագետ ներկա եղե՞լ է բանախոսությանը, մասնագիտական հոդված, խոսք գրե՞լ է։ Ի՞նչ չափորոշիչներով է գնահատվել այդ ծրագիրը, եթե, իհարկե, գնահատվել է։
Եթե պետբյուջեի հաշվին է իրականացվում, ուրեմն պետք է հենց ԿԳՄՍՆ-ը դրամաշնորհային ծրագիր ներկայացներ, դրա մասին հայտարարվեր, հայտեր ընդունվեին ու ընտրություն կատարվեր, որի արդյունքում «լավագույնը ճանաչվեր» «Կրթվելը նորաձև է» նախագիծը։ Կա՞ այդպիսի ընթացակարգ, որտե՞ղ է այն հրապարակվել, ո՞վ է կարդացել ու իրազեկվել դրա մասին։
Որևէ մեկը կարո՞ղ է ԵՊՀ-ի, ԳԱԱ-ի, Մատենադարանի դահլիճներում կրթամշակութային հեղինակային բանախոսություն անց կացնել։ Թույլ կտա՞ն։ ԿԳՄՍՆ-ն հավաստագիր չի՞ պահանջի, չի՞ հարցնի՝ կրթամշակութային ծրագիրն ո՞վ է հաստատել, ո՞ր մասնագետները, ի՞նչ հանձնաժողով է եղել, ի՞նչ է այն սովորեցնում լսարանին՝ զբաղեցնելով պետական դահլիճներ, ծախսելով պետբյուջեի գումարները։ Գուցե այն հակակրթական ու հակամշակութային, հակապետական ու հակազգային բովանդակություն ունի։
