«Արցախի շուրջն օղակը սեղմվում է, իսկ կառավարության ղեկավարը, մոռանալով, որ այլևս լրագրող չէ, փոխանակ կանխելու վերահաս աղետն, ուղղակի անհաղորդ դեմքով ազգին տեղեկացնում է, որ հակառակորդն Արցախում հերթական բարձունքն է վերցրել ու Գորիս-Ստեփանակերտ ճանապարհն է փակել»,- նման տեսակետ Ազգային ժողովի «Հայաստան» խմբակցության պատգամավոր Քրիստնե Վարդանյանն է հայտնում։
Նա այն համոզմանն է, որ Ադրբեջանի նախագահ Իլհամ Ալիևն իր քայլերը համադրում է ՀՀ վարչապետ Նիկոլ Փաշինյանի հայտարարությունների ու գործողությունների հետ։
Նրա փոխանցմամբ՝ մի քանի օր առաջ Կապանում են եղել, որտեղ նկատել են, որ շինարարները հերթական գրունտային ճանապարհն են սարքում։
«Հետաքրքրվեցինք՝ ինչի՞ համար են այդ ճանապարհը սարքում, հիմա՞ ինչ աղետի պատրաստ լինենք․․․ Այսինքն՝ այս ճանապարհի փակվելն այնպես չի, որ անակնկալ է իշխանության համար. նրանք, նախապես իմանալով այդ մասին, այլընտրանքային ելքերի կամ ճանապարհների մասին են մտահոգվում։
Նախորդ տարվա ընթացքում ամենատարբեր պաշտոնյաներ, կապված Ադրբեջանի կողմից ՀՀ ինքնիշխան տարածքն օկուպացնելու հետ, տարբեր թվեր են հայտարարել։ Այդ հանգամանքը հաշվի առնելով՝ ԱԱԾ-ին հարցում եմ ուղարկել, որպեսզի հստակեցնեն, թե ի վերջո՝ քանի՞ քկմ տարածք է գտնվում ադրբեջանցիների վերահսկողության տակ։ Նրանք երեք դրվագով են պատասխանել այս հարցին՝ շրջանցելով Գորիս-Կապան ճանապարհի մասը։ Եվս մեկ հարցում եմ ուղարկել՝ ճշտելու, թե արդյո՞ք Գորիս-Կապան ճանապարհն օկուպացվել է, ու ինչ է պարզվում՝ իշխանություններն ու պետական ապարատն այդ ճանապարհն օկուպացված չեն համարում»,- մանրամասնում է Վարդանյանը։
Ս․Վ․
