ԱՄՆ նախագահ Դոնալդ Թրամփը, երեքշաբթի ՄԱԿ-ում ելույթ ունենալով, հայտարարել է, որ անվերահսկելի ներգաղթը և կլիմայի փոփոխության դեմ պայքարը կործանում են Եվրոպան. գրում է BBC-ն։
«Ժամանակն է վերջ դնել բաց սահմանների անհաջող փորձին։ Ձեր երկրները դժոխք են գնում», – ասել է Թրամփը ՄԱԿ-ի Գլխավոր ասամբլեայի նիստին։
Մինչ այդ՝ նա ասել է, որ ներգաղթյալները՝ տարբեր մշակույթների և կրոնների մարդիկ, ոչնչացնում են ընդունող երկրների մշակույթը, տնտեսությունը և օրենքն ու կարգը, ինչպես նաև հայտարարել է, որ իր վարչակազմն արդեն իսկ կանխել է զանգվածային անօրինական ներգաղթը դեպի Միացյալ Նահանգներ։
Թրամփը վստահեցրել է, որ խնդրահարույց երկրների փախստականներին համակրում է։
«Բայց մենք պետք է լուծենք նրանց երկրներում առկա խնդիրները, այլ ոչ թե ընդունենք նրանց մեր սեփական երկրներում», – ասել է ԱՄՆ նախագահը։
Անդրադառնալով Ուկրաինայի պատերազմին՝ Թրամփը կրկնել է այն, ինչ ասել է բազմիցս՝ կարծում է, որ շատ հեշտ կլինի դադարեցնել պատերազմը Պուտինի հետ իր հարաբերությունների շնորհիվ, և այժմ ԱՄՆ-ն պատրաստ է սահմանել «շատ ուժեղ մաքսատուրքեր, որոնք շատ արագ կկանգնեցնեն այս պատերազմը», բայց միայն այն դեպքում, եթե Եվրոպան դադարեցնի նավթ և գազ գնել Ռուսաստանից։
«Դուք պետք է անհապաղ դադարեցնեք Ռուսաստանից էներգիայի բոլոր գնումները։ Հակառակ դեպքում՝ մենք ժամանակ ենք վատնում», – ասել է Թրամփը։
Երկրորդ պատճառը, թե ինչու է «Եվրոպան դժոխք գնում», ըստ Թրամփի, կլիմայի փոփոխության դեմ պայքարելու համար «կանաչ էներգիային» անցնելու քաղաքականությունն է։
Թրամփը վերականգնվող էներգիան, մասնավորապես՝ հողմային էլեկտրակայանները, անվանել է անհեթեթություն և չափազանց թանկ ձեռնարկություն, իսկ կլիմայի փոփոխության հետևանքների մասին վերջին քառասուն տարիների ընթացքում ՄԱԿ-ում հնչած ապոկալիպտիկ կանխատեսումները որակել է որպես «ամենամեծ խաբեություն»։
