Նիկոլ Փաշինյանն ու Սուրեն Պապիկյանը, մինչև նախաքննության ավարտը, նպատակահարմար չեն գտնում հանդիպել Ազատ գյուղի հրդեհված զինվորական կացարանում սպանված 15 զինծառայողների ծնողների հետ։
Ինչպես հայտնի է, ծնողները՝ որպես բողոքի ակցիա, ապրիլի 18-ին փակել էին Երևան-Սևան ճանապարհը։ Գեղարքունիքի մարզպետ Կարեն Սարգսյանը նրանց խոստացել էր, որ Փաշինյանի ու Պապիկյանի հետ հանդիպելու պահանջի մասին իշխանություններին կտեղեկացնի, բայց նրանք չեն ուզում հանդիպել ծնողների հետ։
Սպանված զինվորների ծնողներն այսօր հավաքվել էին Կառավարության դիմաց՝ պահանջելով հանդիպում Փաշինյանի ու Պապիկյանի հետ։ Նրանք մերժում են պաշտոնական այն վարկածը, որը հունվարի 19-ին՝ Կառավարության նիստի ժամանակ, դեպքից ընդամենը ժամեր անց հայտարարեց Փաշինյանը՝ իբր կացարանը այրվել է, որովհետև զինծառայողներից մեկը 5 լիտրանոց տարայից բենզին է լցրել վառարանի մեջ, ու կրակը բռնկվել է։
Ավելի ուշ դասակի հրամանատարը լրագրողներին հայտնել էր, որ կացարանում բենզին չի եղել՝ հերքելով Փաշինյանին:
Գլխավոր մեղադրյալ, կապիտան Եղիշե Հակոբյանը, որին է մեղսագրվում վառարանը բենզինով վառելու արարքը, որն առաջացրել է 15 զինծառայողների մահը, դուրս է գրվել հիվանդանոցից և կալանավորվել։
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը ու ևս 7 բարձրաստիճան զինվորական։
Ծնորղներն այս ամենը աչքկապոցի են համարում, որովհետև սեփական հետաքննություն են անց կացրել և ունեն իրենց որդիների սպանության սեփական վարկածը։
«Ինչու այս դեպքը եղավ հենց հունվարի 19-ին, առանց հետաքննելու և լուսանկարելու՝ ինչո՞ւ երեխեքին հանեցին կացարանից, ինչո՞ւ Փաշինյանն ու Պապաիկյանը մեզ չեն ընդունում, թեև 3 ամիս է նրանցից դա ենք պահանջում։ Մենք շատ հարցեր ունենք նրանց տալու։ Եկել ենք, որ հանդիպենք, ասում են՝ փախել է, շենքում չի: Չունի պատասխան, դրա համար էլ փախչում է»,- ասաց ծնողներից մեկը։
Կառավարության դիմաց բողոքի ակցիային նրանց հետ մասնակցում է նաև փաստաբան Նորայր Նորիկյանը։
