«Դոմփելու», «շինելու», «թափ տալու», ժուչոկ ու տեսախցիկ դնելու, մարդկանց վրա թքելու մեծ սիրահարները «պայքարում են մարդկանց անկողին մտնողների ու հայհոյողների դեմ»

ԱԺ նախագահ Ալեն Սիմոնյանը ԶԼՄ-ներին հայտնել է, որ «Իմնեմնիմի» հաղորդման հեղինակներ Նարեկ Սամսոնյանի և Վազգեն Սաղաթելյանի դեմ հանցագործության մասին հաղորդում ինքն է ներկայացրել՝ հայտարարելով, թե մարդկանց անկողին մտնողների ու հայհոյանք տվողների դեմ պետք է պայքարել։
Իսկ թիկնապահների միջոցով մարդու ձեռքերը բռնել տվողի ու նրա վրա թքողի դեմ չպե՞տք է պայքարել։
Իսկ մարդկանց՝ ընդդիմադիրների, հոգևորականների հեռախոսազանգերը գաղտնալսելու, նրանց բնակարաններում, գրասենյակներում ժուչոկ դնելու իշխանական մարտավարության դեմ չպե՞տք է պայքարել։ «Դոմփելու», «շինելու», «թափ տալու» մեծ սիրահար գերագույն հրամանատարի նկրտումների դեմ չպե՞տք է պայքարել։

Վազգեն Սաղաթելյանին և Նարեկ Սամսոնյանին Ալեն Սիմոնյանն անվանել է շան լակոտներ։ Դրա համար պատիժ չկա՞, դա վիրավորանք չէ՞։ Ինչին ի պատասխան էլ տղաներն «Իմնեմնիմի» հաղորդման ուղիղ եթերում կոշտ պատասխան են ուղղել ԱԺ նախագահին։

Եթե կա մի բան, որ իշխանություններն անթերի են անում՝ ժուչոկ, տեսախցիկ դնելն է, գաղտնալսելն է, մարդկանց անկողին մտնելն է, ծանր հանցագործություն կատարածին բնորոշ՝ բերանքսիվայր, ֆիզիկական ուժ գործադրելով, գետնին քարշ տալով բերման ենթարկելն է, երբ նրանց «մեղքն» ապացուցված չէ, գաղտնալսված խոսակցությունները կոնտեքստից կտրելով՝ ընդդիմադիրներին համատարած բանտեր լցնելն է։

Աբովյանում ծանր հանցագործություն է կատարվել։ 24 տարեկան տղայի են դանակահարել-սպանել, մյուսն էլ վիրավոր է, հիվանդանոցում պառկած։ Ոստիկանները մինչև հիմա ծանր հանցագործություն կատարածին չեն գտել։ Ի դեպ, պարզվել է, որ նա 14 տարի առաջ էլ է մարդ սպանել, այսինքն՝ մարդ սպանելը նրա համար սովորական բան է։ Բազմահազար ոստիկանական ուժերը, ոստիկանական նորաստեղծ գվարդիան չեն կարողանում մի մարդասպանի բռել, բայց կարողանում են իշխանությանը քննադատողներին ստորացնելով, գետնաքարշ բերման ենթարկել ու նետել բանտ։

Վախի, բռնաճնշումների, բռնադատումների «ժողովրդավարության բաստիոնում» 37 թիվն է։