Իրանում ցուցարարները շարունակում են փողոցային ակցիաները։ Երկրում ինտերնետը անջատվել է։ Միայն երկու հիվանդանոցներ երկու օրվա ընթացքում տեղափոխվել է ավելի քան 100 դի։ Մարդու իրավունքների պաշտպանները պնդում են, որ զոհերի թիվը գերազանցել է 500-ը. հայտնում է BBC-ն։
BBC-ին և այլ միջազգային լրատվամիջոցների գործունեությունն Իրանում արգելված է։ Ավելին, Իրանի իշխանությունները հինգշաբթի օրվանից անջատել են ինտերնետը և հեռախոսային կապն անջատել են, ինչը էլ ավելի է բարդացնում տեղեկատվության հավաքագրումն ու ստուգումը. գրում է BBC-ն։
Արտաքին աշխարհի հետ կապվելու միակ հնարավոր ճանապարհը Starlink արբանյակային տերմինալն է։
Իրանի 15 նահանգներում բողոքի ակցիաները և բախումները շարունակվում են: TIME ամսագրի տվյալներով՝ միայն Թեհրանում կարող է մինչև 217 զոհ լինել, այս թվերը ոչ պաշտոնական են։ Երեկ հայտնի դարձավ, որ Իրանում հայ ցուցարար է սպանվել` Էջմին Մասիհի, որը Մաջիդիե թաղի բնակիչ է։
Իրանի կառավարությունն աշխատում է երկրում ինտերնետի կապի վերականգնման ուղղությամբ, կապի սահմանափակման մասին որոշումն անվտանգության մարմիններն ընդունել են վերջին օրերին սկսված անկարգություններից հետո, այս մասին երկու օր առաջ հայտնել է Իրանի տեղեկատվական և հաղորդակցական տեխնոլոգիաների նախարարությունը:
ԱՄՆ-ում գործող իրանական HRANA իրավապաշտպան կազմակերպությունը կիրակի օրը հայտարարեց, որ իր տվյալների համաձայն՝ արդեն սպանվել է ավելի քան 500 մարդ՝ 490 ցուցարար և 48 անվտանգության աշխատակից։ HRANA-ն նաև պնդում է, որ արդեն ձերբակալվել է 10,000 մարդ. գրում է BBC-ն։
Իրանի վերջին շահի որդին՝ Ռեզա Փեհլավին, որը ներկայումս բնակվում է Միացյալ Նահանգներում, կիրակի առավոտյան Fox հեռուստաալիքին տված հարցազրույցում ասել է, որ վերջին երկու օրերի ընթացքում Իրանում ավելի շատ մարդ է սպանվել, քան 2001 թվականի սեպտեմբերի 11-ին Միացյալ Նահանգներում տեղի ունեցած ահաբեկչական հարձակումների ժամանակ։ Այդ ժամանակ զոհվել է գրեթե 3000 մարդ։
Հինգշաբթի օրը ԱՄՆ նախագահ Դոնալդ Թրամփը հայտարարեց, որ մտադիր չէ հանդիպել Փեհլավիի հետ։
Թրամփը, որը վերջին օրերին բազմիցս սպառնացել է Իրանի իշխանություններին ԱՄՆ միջամտությամբ, շաբաթ օրը իր սոցիալական ցանցերի էջում գրել է. «Իրանը ձգտում է ազատության, գուցե ինչպես երբեք։ ԱՄՆ-ն պատրաստ է օգնել»։
Կիրակի օրը «Wall Street Journal»-ը՝ հղում անելով անանուն պաշտոնյաների, հաղորդել էր, որ Թրամփը նախատեսում է հանդիպել իր վարչակազմի ավագ անդամների հետ՝ Իրանում տեղի ունեցող բողոքի ցույցերին արձագանքելու կոնկրետ տարբերակներ քննարկելու համար։
Թերթի տվյալներով՝ այդ տարբերակների թվում են Իրանին հարվածներ հասցնելը, ռազմական և քաղաքացիական կառույցների դեմ կիբերհարձակումները, Իրանի կառավարության դեմ նոր պատժամիջոցները և ընդդիմադիր առցանց ռեսուրսներին աջակցությունը։
Ամերիկյան մամուլը նախկինում հաղորդել էր, որ Թրամփին տեղեկացվել է երկրի դեմ ռազմական հարվածների տարբերակների մասին։
«Նյու Յորք Թայմս»-ը և «Ուոլ Սթրիթ Ջըրնալ»-ը հաղորդել են, որ ճեպազրույցները տեղի են ունեցել, իսկ WSJ-ն դրանք որակել է որպես «նախնական քննարկումներ»: Անանուն պաշտոնյան WSJ-ին ասել է, որ այս պահին Իրանի համար «անմիջական սպառնալիք» չկա:
Թրամփը նախկինում սպառնացել էր հարձակվել Իրանի վրա, եթե կառավարությունը բռնություն կիրառի ցուցարարների նկատմամբ, իսկ պետքարտուղար Մարկո Ռուբիոն հայտարարել էր, որ ԱՄՆ-ն կանգնած է Իրանի ժողովրդի կողքին։
Իրանի խորհրդարանի խոսնակ Մոհամմադ Բաղեր Քալիբաֆը կիրակի օրը զգուշացրել է, որ եթե ԱՄՆ-ն հարձակվի Իրանի վրա, Իսրայելը և տարածաշրջանում գտնվող ամերիկյան բոլոր ռազմական ու ռազմածովային բազաները կդառնան Թեհրանի պատասխան հարձակումների օրինական թիրախներ։
«Այն, ինչ հիմա տեղի է ունենում, բողոքի ցույցեր չեն, այլ երկրի դեմ ահաբեկչական պատերազմ»,– հայտարարել է Իրանի ԱԳ նախարար Աբբաս Արաղչին։ Նախարարը նաև նշել է, որ իրավիճակն այժմ ամբողջովին Իրանի իշխանությունների վերահսկողության ներքո է։
