Հուլիսի 15-ին, Երեւանի ընդհանուր իրավասության դատարանի «Կենտրոն» նստավայրում՝ նախնական դատալսման ընթացքում՝ պետք է քննության առարկա դառնար մայիսի 17-ից անազատության մեջ գտնվող Արմեն Գրիգորյանի խափանման միջոցի հարցը։ Պրոդյուսեր, հասարակական-քաղաքական գործիչ Գրիգորյանը նիստերի դահլիճ մտավ ժպիտը դեմքին: Նա հանկարծամահ եղավ դատական նիստի մեկնարկից րոպեներ անց:
Արմեն Գրիգորյանի մահվան օրը՝ «Դիմադրություն» շարժման հանրահավաքի ժամանակ, նրա պաշտպան Ռուբեն Մելիքյանը հետաքրքիր բացահայտումներ արեց՝ անդրադառնալով իր պաշտպանյալի մահվան հանգամանքներին, որոնք ներկայացնում ենք ստորև.
- Արմեն Գրիգորյանի նկատմամբ իրականացվում էր ակնհայտ քաղաքական հետապնդում:
- Արմեն Գրիգորյանն ուներ առողջական խնդիր, բայց որևէ մեկին թույլ չէր տալիս խոսել այդ մասին: «Հանկարծ որևէ մեկի մտքով չանցնի, որ ես ինչ-որ առողջական խնդիրներ եմ առաջ բերում, որպեսզի պատասխան չտա: Ես իմ ցանկացած խոսքի համար պատրաստ եմ պատասխան տալ: Ես քաղաքական հետապնդման եմ ենթարկվում, որը պատվով եմ տանելու մինչև վերջ»,- Արմեն Գրիգորյանի խոսքերն են:
- Արմենին սպանեցին Ֆրանսիայի հրապարակի համար:
- Արգելք էր դրված Արմեն Գրիգորյանի տեսակցությունների վրա:
- Արմեն Գրիգորյանի մահվան մեղավորության սլաքները միանգամայն սխալ տեղ են ուղղում՝ դեպի քրեակատարողական հիմնարկ: Խնդիրները ուրիշ տեղ են: Խնդիրն այն է, թե ինչո՞ւ Արմեն Գրիգորյանն առհասարակ քրեակատարողական հիմնարկում հայտնվեց: Խնդիրն այն է, թե Արմեն Գրիգորյանին ինչի համար են նստեցրել, ե՞րբ են նստեցրել, ովքե՞ր ու ո՞ւմ հրամանով: Արմեն Գրիգորյանը քրեակատարողական հիմնարկում բացառապես իր քաղաքական հայացքների համար է հայտնվել: 2021 թվականի ապրիլին, մի հաղորդման ժամանակ մի քանի էմոցիոնալ խոսքի համար, որը հիշեցին 2022 թվականի մայիսին:
- Արմեն Գրիգորյանի նկատմամաբ քաղաքական և քրեական հետապնդումը սկսվել է այն խոսքերի համար, որոնք մի եթերի ժամանակ նա արտահայտել է առաջին ու վերջին անգամ Եռաբլուր այցից հետո:
- Արմեն Գրիգորյանի մարդասպաններին ման մի եկեք այնտեղ, որտեղ նրանք չկան: Նրանց ման եկեք այդ գրչի հարվածները դնող քննիչների, դատախազների, դատավորների մեջ: Նրանց պատվեր տվողների մեջ:
- Քննիչ Մարկոսյան, դատախազ Երեմյան, դատավորներ Ալեքսանյան, Հովհաննիսյան. նրանք են, որ անազատության մեջ տեղավորեցին Արմենին և չազատեցին: Ձեր երեխաների վրա մի թողեք Արմեն Գրիգորյանի արյունը՝ խոստովանեʹք և ապաշխարեʹք…
«Ուրախների ու հնարամիտների ակումբի» նախկին անդամ, պրոդյուսեր Արմեն Գրիգորյանի հոգեհանգիստն այսօր է, ժամը 17:30-ին Նոր Նորքի Սուրբ Սարգիս եկեղեցում (Մասիվի եկեղեցի), իսկ հուղարկավորությունը՝ հուլիսի 18-ին ժ.13:00։
