2022 թվականի սեպտեմբերյան այս օրերին Ադրբեջանը ռազմական գործողություններ սկսեց Հայաստանի Սյունիքի, Վայոց ձորի և Գեղարքունիքի ուղղություններով։
Թշնամին շրջափակման մեջ վերցրեց մեր կարևորագույն դիրքերը՝ բարձունքներ, որտեղից հայկական զինուժի շարժը հստակ երևում է, չհաշված, որ ադրբեջանցի զինվորները մոտեցան հայկական բնակավայրերին։
Ադրբեջանական ագրեսիային զոհ գնաց 224 զինվոր։ Թշնամին ամիսներ շարունակ նշանառության տակ էր պահում արդեն գրաված հայկական դիրքերն ու տարածքները՝ թույլ չտալով, որ մերոնք այդ վայրերից հանեն զոհվածների մարմինները, օգնություն ցույց տան վիրավորներին։
Արդեն 3 տարի թշնամին ՀՀ ինքնիշխան տարածքից 210 քկմ գրավել է ու դուրս գալու մտադրություն չունի։ Հայաստանի իշխանությունները եթե սկզբում իրենց ելույթներում հիշեցնում էին Ալիևին, որ նրա զորքը ապօրինաբար ներխուժել է ՀՀ տարածք, ապա այսօր «հույսները դրել են» սահմանազատման գործընթացի վրա՝ իբր այդ ժամանակ պարզ կդառնա՝ 1991 թվականի Ալմաթիի փաստաթղթով որտեղո՞վ է անցնում հայ-ադրբեջանական սահմանը, սահմանագծումն ըստ այդմ էլ կարվի։
Հարցին, թե ադրբեջանցիները ե՞րբ են դուրս գալու ՀՀ տարածքից, ե՞րբ են ազատելու մեր 210 քկմ հատվածը, ԱԺ նախագահ Ալեն Սիմոնյանը երկու օր առաջ պատասխանեց՝ մենք էլ Ադրբեջանի տարածքից ենք 100 քկմ վերցրել։
Ադրբեջանի՝ Հայաստանի սահմանների վրա հարձակվելուց հետո 3 տարի է անցել։ Երկու օրում 224 զոհ ենք ունեցել։ Իշխանությունները չեն էլ հիշել այդ տարելիցը, ոչ մի դատապարտող խոսք՝ Ադրբեջանին, ոչ մի հիշատակի խոսք՝ մեր զոհված տղաներին։ Կարծես այդպիսի ողբերգական օրեր չենք էլ ապրել։
Ավելին՝ Փաշինյանն այսօր «Վարչապետի գավաթ» խճուղային հեծանվավազքի մրցաշար է անց կացնում։
Փաշինյանն անում է այն, ինչ ասել է՝ մենք պետք է ապրենք ուրախ ու երջանիկ, պետք է փոխենք մեր նահատակներին սգալու ձևը։
