Աղավնոյում մարդիկ այրում են իրենց տները, արտաշիրիմում անում իրենց հարազատների մարմինները, կպատկերացնե՞ք, որ հաջորդը կարող եք դուք լինել

«Որդիս և իր մարտկոցի 20 զինվորները զոհվել են Փաշինյանի և նրա խունտայի կողմից ծրագրված  ու ծախված պատերազմում, հրամկազմի միտումնավոր ստեղծած քաոսի, դավաճանության, սխալ հրամանների հետևանքով։ Սարսափելին այն է, որ պատերազմից 2 տարի անց, մինչ օրս,  բարձրագույն իշխանության որևէ ներկայացուցիչ չի պատժվել։ Մեր երեխաներն արդեն չկան, բայց ապրողների համար պարտավոր ենք պայքարել, որ ունենան հայրենիք։

14 ամիս մենք փնտրել ենք ՑՈՐ-ի տղաներին՝ մեր երեխաներին։

Մինչ օրս ունենք բազմաթիվ անհետ կորածներ ու գերեվարվածներ, իսկ իշխանությունը մատների արանքով, ցինիզմով է նայում այս ամենին ու կարծես ծաղրում է մեզ։ Մեր երեխաների համար այլևս ոչինչ չենք կարող անել, բայց ապրողների համար պետք է պայքարենք, որ նրանք ունենան Հայրենիք։ Ես, որ անցել եմ դժոխքի միջով, չեմ ուզում, որ նույնը կրկնվի ձեր երեխաների հետ։

Ես տեսնում էի, թե ինչպես են Աղավնոյում մարդիկ այրում իրենց տները, արտաշիրիմում անում իրենց հարազատների մարմինները։ Կարո՞ղ եք պատկերացնել, որ հաջորդը կարող եք դուք լինել։

Եկեք վերջին ճիգը գործադրենք ու քշենք մեր երկրից այս թուրքական խունտային, խնդրում եմ, ժողովուրդ, ես այլևս ոչինչ չունեմ»,-Հանրապետության հրապարակում տեղի ունեցող հանրահավաքի ժամանակ ասաց 44-օրյա պատերազմում զոհված Հայկ Մելիքյանի մայրը։