Առինջ մոլում այսօր կեսօրից լարված իրավիճակ է․ իրավապահ մարմինների ներկայացուցիչները կապարակնքել են տոնավաճառի բազմաթիվ տաղավարներ։ Ինչպես նշեցին աշխատակիցներից շատերը, իրավապահներն այդ գործընթացն իրականացրել են տոնավաճառի ոչ աշխատանքային օրվա ընթացքում՝ առանց նախապես տեղյակ պահելու։
Ինչպես լրագրողների հետ նշեցին Առինջ մոլի առևտրականները, իրենց պահանջը մեկն է՝ բացել տաղավարները։
«Որովհետև բոլորն էլ օրավարձով աշխատող են։ Չի կարելի մի ամբողջ ժողովրդի անգործության մատնել։ Իշխանությունը թող իր խնդիրները լուծի, իսկ ժողովուրդն աշխատի։ Յուրաքանչյուր խանութ 2-3 աշխատող ունի, 200-ից ավելի խանութ կա»,- ասաց մի կին աշխատակից։
Մի տղամարդ էլ նշեց, որ երեքշաբթի եկել-տեսել են,որ իրենց տաղավարները կապարակնքված են։ Ըստ նրա՝ ոչ ոք իրենց հստակ պատասխան չի տալիս։
«Ասում են՝ բարձրավոլտ լարերն են խնդիրը։ Շուկայի բացման օրից մենք այստեղ աշխատել ենք, այսօր չգիտենք՝ ապրանքներն ինչ պետք է անենք։ Քննչականն ասում է՝ օր որոշեք, գանք բացենք տաղավարները, ձեր ապրանքները տանեք։ Բայց ո՞ւր տանենք մեր ապրանքները»,- հարց ուղղեց նա։
Խանութներից մեկի սեփականատեր Զարուհի Պետրոսյանն էլ նշեց՝ ուզում են հասկանալ՝ եթե իրենց տաղավարները փակեն, իրենք ի՞նչ են անելու, անաշխատա՞նք են մնալու։
«Ո՞վ է արել սա. նրանից էլ պահանջում ենք՝ պարոն Փաշինյա՞նը։ Իրենից էլ պահանջում ենք»,- ասաց նա։
Հիշեցնենք՝ Առինջ Մոլի սեփականատերը գործարար Գագիկ Ծառուկյանն է։ Նա այս պահին կալանավորված է։
