ՌԴ ԱԳ նախարար Սերգեյ Լավրովը հայտարարել է, որ Իրանը չի ծրագրում միջուկային զենք ստեղծել, ուստի ռուսական կողմն ակնկալում է, որ Սաուդյան Արաբիան նույնպես այն չի ունենա, գրում է «Կոմերսանտը»։ Նա ընդգծել է, որ աշխարհում ոչ ոք չի ցանկանում նոր միջուկային երկրների ի հայտ գալը։
Սեպտեմբերի 21-ին Սաուդյան Արաբիայի թագաժառանգ արքայազն Մուհամմեդ բեն Սալմանը Fox News-ին տված հարցազրույցում ասել է, որ թագավորությունը «անվտանգության նկատառումներից ելնելով և տարածաշրջանում ուժը հավասարակշռելու համար» ստիպված կլինի միջուկային զենք ձեռք բերել, եթե այդպիսին հայտնվի Իրանում:
«Ես լսել եմ, թե ինչ է ասվել։ Ես սա համարում եմ փաստի հաստատում. ոչ ոք չի ցանկանում, որ մոլորակի վրա հայտնվեն նոր միջուկային պետություններ։ Իրանը բազմիցս հաստատել է, որ իրենք նման մտադրություն չունեն։ Նրանց հոգևոր առաջնորդը նույնիսկ համապատասխան ֆեթվա է արձակել։ Հետևաբար, մենք ելնում ենք նրանից, որ քանի որ նրանք ռումբ չեն ունենալու, ուրեմն Իրանի հարևաններն այս ճանապարհով գնալու գայթակղություն չեն ունենա»,- ասել է Լավրովը ՄԱԿ-ի Գլխավոր ասամբլեայի արդյունքներին հաջորդած ճեպազրույցում (մեջբերումը ՌԻԱ Նովոստիի):
2023 թվականի փետրվարի 20-ին Ատոմային էներգիայի միջազգային գործակալության տեսուչները եզրակացրել էին, որ Իրանը հասել է ուրանի 84% հարստացման։ Այն ժամանակ Իրանի իշխանությունները հերքել էին դա։
