Շարունակվում են Իսրայելի ու Իրանի միջեւ աղետաբեր հետեւանքներով կանխատեսելի բախումները։ Շատերն էին կանխատեսում, որ Իսրայելն ի վերջո ԱՄՆ-ի հովանավորությամբ հարվածելու է Իրանին, եւ բոլորը գիտեին, որ Իրանն այդ հարվածներին արձագանքելու հարցում երկտանքի գիրկը չի ընկնելու։
Պատերազմի վտանգը կանխատեսելու համար այս դեպքում քաղաքագիտական խոր գիտելիքներին տիրապետելը պարտադիր պայման չէր։ Իրանի հովանավորությունը վայելող պրոքսի ուժերի թուլացմանը հանգեցրած քայլերից հետո մերձավորարեւելյան տարածաշրջանում տիրող լարված իրավիճակն արդեն իսկ չարագուշակում էր մոտալուտ պատերազմի արհավիրքը։
Կանխատեսելով պատերազմի վտանգը, Իրավիճակը չսրելու համար, Իրանը նույնիսկ նահանջել էր իր մի շարք սկզբունքային դիրքերից ու ընդունել ԱՄՆ նախագահի առաջարկը, եւ «դիվանագիտական ելք, թե պատերազմ» երկընտրանքի հարցում կողնորոշվել հօգոտ առաջինի։
Երեկ, ռազմական բախումներին զուգահեռ, ՄԱԿ-ի անվտանգության խորհրդի հարթակը նույնպես վերածվել էր դիվանագիտական «փոխհրաձգությունների» դաշտի, որտեղ հանդես եկան ՄԱԿ-ում Իրանի ու Իսրայելի մշտական ներկայացուցիչները։
Իրանի մշտական ներկայացուցիչ Ամիր Սաիդ Իրավանին Անվտանգության խորհրդի արտակարգ նիստում պահանջեց խստագույնս դատապարտել Իսրայելի կողմից Իրանի դեմ իրականացված ագրեսիան, ակնկալելով Խորհուրդի գործնական ու շոշափելի քայլերը՝ Իսրայելին պատասխանատվության ենթարկելու եւ միջազգային խաղաղության ու անվտանգության հետագա խաթարումը կանխելու համար։
Իսկ Իսրայելի մշտական ներկայացուցիչ Դենի Դանոնը գործադրված ագրեսիան ներկայացրել է որպես պատասխան քայլ՝ տարիներ շարունակ ԻԻՀ պաշտոնատար անձանց կողմից Իսրայելի դեմ հնչեցրած հայտարարություններին։
Իրանի ու Իսրայելի միջեւ ընթացող ռազմական գործողությունների պայմաններում նախատեսվում էր վաղը՝ հունիսի 15-ին Օմանի մայրաքաղաք Մասկատում անցկացնել Իրան-ԱՄՆ միջուկային բանակցությունների հերթական փուլը։ Սակայն Իսրայելի գործողություններն Իրանին ստիպեցին հրաժարվել Միացյալ Նահանգների հետ միջուկային համաձայնագրի շուրջ դիվանագիտական ճանապարհից, որի մասին հայտարարել է Իրանի արտգործնախարար Աբբաս Արաղչին։
Գրիգոր Առաքելյան
