Սփյուռքի գործերի գլխավոր հանձնակատար Զարեհ Սինանյանն այսօր լրագրողների հետ զրույցում հայտարարեց՝ իրանահայերի արտառոց հոսք դեպի Հայաստան չկա։
«Որպես այդպիսին հայերի փախուստ, շարժ դեպի Հայաստան չկա։ Մենք անընդհատ փորձում ենք կապի մեջ լինել, պարբերաբար հնարավոր է լինում, սակայն հիմնականում ոչ։ Մարդիկ տներում են, զգույշ, պարզապես փորձում են վտանգավոր վայրերից հեռու մնալ, հույս ունեն, որ շուտով այս ամենը կվերջանա»,- ասաց նա:
Սինանյանի խոսքով՝ տեղեկություն կար թեթև վիրավորում ստացած 2 իրանահայի մասին, սակայն ավելի ուշ պարզվել է, որ ինֆորմացիան այդքան էլ հստակ չի եղել։
Նա միաժամանակ վստահեցրեց, որ Նիկոլ Փաշինյանն իրեն չի հրահանգել սփյուռքի կառույցներին զգուշացնել չանդրադառնալ Արցախի թեմային` չվնասելու համար ՀՀ արտաքին քաղաքականությանը:
«Ես գիտեմ, թե ինչ հայտարարություններ կարող եմ անել, և որ հայտարարություններն են համահունչ այսօրվա մեր արտաքին քաղաքականությանը, և այդ սահմաններում ես գիտեմ` ինչպես մնալ»,-ասաց հանձնակատարը:
