Իրական Հայաստանի գաղափարախոսությունը ընտրություններով պետք է արձանագրվի 2026 թվականին. Փաշինյան
Հայաստանում տեղի է ունենում գաղափարական տրանսֆորմացիա, եւ անցում է կատարվում դեպի իրական Հայաստանի գաղափարախոսություն: Այս մասին այսօր ԱԺ-ում կառավարության հեր հարցուպատասխանի ժամանակ ասաց Փաշինյանը:
Նա, մասնավորապես, նշեց. «Այդ գաղափարախոսությունը պետք է նախ ձեւակերպվի գրավոր ձեւով որպես փաստաթուղթ: Այդ ձեւակերպումը, որի վրա աշխատանքները մտել են եզրափակիչ փուլ, ես կհամարեի զրոյական կետ: Քանի որ դա զրոյական կետ է, մենք պետք է արձանագրենք, որ այդ կետում ՀՀ-ում այդ գաղափարախոսությունն ունի զրո համախոհ: Մենք այդ կետից պետք է սկսենք այդ համախոհության ձեւավորումը իրական Հայաստանի հայեցակարգի շուրջ:
Պարզ է, որ համախոհների թիվը զրո չէ, բայց ես ճիշտ եմ համարում, որ այսպես առաջ շարժվենք: Երբ որ այդ գաղափարախոսությունը գրավոր տեսք ստանա, օրինակ, ես ինքս ինձ պետք է արձանագրեմ որպես դրա համախոհ եւ այդ գաղափարախոսությամբ գնանք ժողովրդի մոտ ու համախոհություն ձեւակերպենք»,-ասաց Փաշինյանը:
Երկրորդ փուլը, ըստ նրա, պետք է տեղի ունենա այդ գաղափարախոսության նկատմամբ հանրային համախոհության ձեւավորման փուլը. «Եվ երրորդ փուլում այդ գաղափարախոսությունը պետք է քննություն բռնի 2026 թվականի հերթական ընտրություններում: Այո, առաջիկա քաղաքական շրջափուլը հենց ընտրություն է լինելու այս տրամաբանության մեջ: Իրական Հայաստանի գաղափարախոսությունը ընտրություններով պետք է արձանագրվի որպես ՀՀ-ում ժողովրդի եւ ՀՀ-ի պաշտոնական գաղափարախոսություն: Սա է իմ պատկերացումը: Իհարկե, վերջնական որոշումը կկայացնի ՀՀ քաղաքացին»:
Փաշինյանը հավելեց, որ պետք է ՀՀ քքղաքացիներին դարձնեն այդ գաղափարախոսության կրող եւ այդ կրող լինելը պետք է արտահայտվի առաջիկա խորհրդարանական ընտրություններում. «Սա է այն պլանը, որ պատեհ առիթով կներկայացնեմ եւ ժողովրդին, եւ կառավարող մեծամասնությանը, եւ իհարկե ՔՊ-ին»:
Infoport
