Իսպանիայի վարչապետ Պեդրո Սանչեսը չորեքշաբթի օրը նախազգուշացրել է, որ ֆաշիզմը կարող է վերադառնալ, քանի որ X սոցիալական ցանցի սեփականատեր, ամերիկացի միլիարդատեր Իլոն Մասկը՝ ԱՄՆ ընտրյալ նախագահ Դոնալդ Թրամփի դաշնակիցը, «բացահայտ հարձակվում է մեր հաստատությունների վրա» և «ատելություն է սերմանում», գրում է AFP-ն։
Մասկը, ով պետք է պաշտոն ստանձնի Թրամփի վարչակազմում, զայրույթ է առաջացրել ողջ Եվրոպայում՝ մայրցամաքի առաջնորդների, այդ թվում՝ Գերմանիայի կանցլեր Օլաֆ Շոլցի և Մեծ Բրիտանիայի վարչապետ Կիր Ստարմերի դեմ մի շարք հարձակումներով։
Դիկտատոր Ֆրանսիսկո Ֆրանկոյի մահվան 50-ամյակի կապակցությամբ պաշտոնական միջոցառումների մեկնարկին նվիրված ելույթի ժամանակ Սանչեսը մեղադրել է Մասկին «միջազգային ռեակցիոն» շարժում գլխավորելու մեջ, որը «բացահայտ հարձակվում է մեր հաստատությունների վրա, ատելություն է սերմանում և բացահայտ կոչ է անում աջակցել նացիզմի ժառանգորդներին Գերմանիայի առաջիկա ընտրություններում»։
«Այս ամենը խնդիր է, որը պետք է դառնա մարտահրավեր բոլորիս համար, ովքեր հավատում են ժողովրդավարությանը»,- ավելացրել է սոցիալիստ վարչապետը Մադրիդի Թագուհի Սոֆիայի արվեստի թանգարանում կայացած միջոցառման ժամանակ, որտեղ պահվում է Պաբլո Պիկասոյի «Գերնիկա» կտավը՝ հակաֆրանկիստական ամենահայտնի աշխատանքներից մեկը։
«Ավտոկրատական ռեժիմները տարածվում են ամբողջ աշխարհում»,- ասել է Սանչեսը՝ նախազգուշացնելով, որ «ֆաշիզմը, որը մենք կարծում էինք՝ մնացել է անցյալում, այժմ երրորդ քաղաքական ուժն է Եվրոպայում»՝ նկատի ունենալով ծայրահեղ աջ կուսակցությունները, որոնք դիրքեր են ամրապնդել մայրցամաքով մեկ։
